قىتايدا كوروناۆيرۋستان قايتىس بولعاندار سانى 2 مىڭ ادامنان استى. بۇل اقپاراتتى قىتايدىڭ گيگيەنا جانە دەنساۋلىق ساقتاۋ ماسەلەلەرى جونىندەگى مەملەكەتتىك كوميتەتى حابارلادى.

وتكەن تاۋلىكتە (18 اقپان ساعات 24:00-دەگى جاعداي بويىنشا) قىتايدا 1749 ادام كوروناۆيرۋس جۇقتىرىپ، (حۋبەي پروۆينسياسىندا – 1693)، 136 ادام قايتىس بولدى. 1824 ادام ەمدەلىپ شىقتى (حۋبەيدە 1266 ادام).

سوڭعى دەرەكتەر بويىنشا، قحر-دا كوروناۆيرۋس جۇقتىرعاندار سانى 74185 ادامدى قۇراپ وتىر، قايتىس بولعاندار سانى – 2004، ەمدەلىپ شىققاندار – 14376 ادام. قازىرگى ۋاقىتتا ناۋقاستارمەن تىعىز بايلانىستا بولعان 135 مىڭ ادام مەديسينالىق باقىلاۋعا الىنعان.

رەسمي ستاتيستيكاعا سايكەس، ىندەتتىڭ وشاعىنا اينالعان حۋبەي پروۆينسياسىنان تىس ماتەريكتىك قىتايدا كوروناۆيرۋس دياگنوزى قويىلعان ناۋقاستار سانى ون بەسىنشى كۇن قاتارىنان تومەندەپ كەلەدى.

گونكونگتا كوروناۆيرۋس جۇقتىرعان 62 ادام تىركەلدى، ماكاودا (اومەن) – 10، تايۆاندا – 22.

سوڭعى مالىمەتتەر بويىنشا، قازاقستانمەن شەكارالاساتىن قحر شىڭجاڭ-ۇيعىر اۆتونوميالىق ولكەسىندە (ءشۇاو) كوروناۆيرۋس جۇقتىرعان 76 ادام تىركەلگەن، ونىڭ ىشىندە ىلە-قازاق اۆتونوميالىق وبلىسىندا (ءىقاو) سۋار - 18، ءۇرىمجى قالاسىندا – 23. قازىرگى ۋاقىتتا شىڭجاڭدا 5 مىڭنان استام ادام مەديسينالىق باقىلاۋدا. مەديسينالىق مەكەمەلەردەن 12 ناۋقاس ەمدەلىپ شىقتى.