جاپونيانىڭ يوكوگاما پورتىندا كورونوۆيرۋسقا بايلانىستى ەكى اپتا كارانتيندە تۇرعان Diamond Princess لاينەرىنىڭ ەكى جولاۋشىسى كوز جۇمدى. بۇل اقپاراتتى  جاپونيالىق "ەن-ەيچ-كەي" تەلەارناسى مەملەكەتىك اقپارات كوزدەرىنىڭ بىرىنە سىلتەمە جاساپ حابارلادى، الايدا دەرەككوزدىڭ اتى اتالمادى. 

تەلەارنانىڭ مالىمەتىنشە، ۆيرۋستىڭ سالدارىنان مەرت بولعاندار ايەل مەن ەر ادام. ەكەۋىنىڭ دە جاسى 80-نەن اسقان جاپونيا ازاماتى. ولاردان 11-12 اقپان كۇندەرى ۆيرۋس انىقتالىپ، ەمحاناعا جاتقىزىلعان. ءبىراق ەكەۋىندە دە ۆيرۋس جۇقتىرعانعا دەيىن باسقا اۋرۋلارى بولعان. 

Diamond Princess كەمەسى ەكى اپتا بويى يوكوگاما پورتىندا كارانتيندە تۇردى. جاپونيا بيلىگى كەشە عانا كارانتين مەرزىمى اياقتالعانىن حابارلاپ، كوروناۆيرۋس انىقتالماعان جانە ونىڭ بەلگىلەرى جوق 500 جولاۋشىنىڭ جاعاعا شىعۋىنا رۇقسات بەردى. كەمەدە ۆيرۋس جۇقتىرعان ادامدار ءالى تىركەلىپ جاتىر. كەمەدەگى ناۋقاستاردىڭ سانى 621-گە جەتتى. بۇل جۇڭگو شەكاراسىنان تىس اۋماقتا Covid-19 ۆيرۋسىن جۇقتىرعانداردىڭ ەڭ ۇلكەن شوعىرى. كارانتين كەزىندە ينفەكسيا جولاۋشىلار اراسىندا تەز تاراپ كەتتى. بىرنەشە مەملەكەت كارانتين بىتكەنشە ازاماتتارىن ەۆاكۋسيالادى. ازىرگە كەمەدەن قارت ادامدار شىعارىلدى. كارانتين باستالعان ۋاقىتتا لاينەردە 3700 جولاۋشى مەن ەكيپاج مۇشەسى بولعان.

بۇل كەمەدە ءتورت قازاقستان ازاماتى بار. كەشە قازاقستاننىڭ سىرتقى ىستەر مينيسترلىگى كەمەدەگى ءتورت قازاقستاندىق 19 اقپاندا كارانتيننەن شىعادى، قوسىمشا تەستەن امان-ەسەن وتسە، جاقىن ارادا قازاقستانعا ورالادى دەپ مالىمدەگەن ەدى. سىرتقى ىستەر مينيسترلىگىنىڭ ايتۋىنشا، ءتورت ازاماتتان كوروناۆيرۋس تابىلماعان. ولار جاقىن كۇندەرى قازاقستان مەن جاپونيا اراسىنداعى تىكەلەي رەيس ارقىلى ەلگە جەتەدى. ءبىراق ولار جول شىعىنىن وزدەرى وتەيدى.

جۇڭگو بيلىگى بەيسەنبى كۇنى ۆيرۋس جۇقتىرعاندار مەن قازا تاپقاندار سانىنا قاتىستى جاڭا دەرەك ۇسىندى: قايتىس بولعاندار سانى - 2112، ءبىر كۇن بۇرىنعى مالىمەتتەن 108-گە كوپ. جالپى ىندەت جۇقتىرعاندار 74 مىڭنان استى، وتكەن تاۋلىكتە 628 جاڭا وقيعا تىركەلدى.