شىمكەنت ماڭىنداعى اسكەري بولىمنەن قاشقان ابىلاي بالعىنبايەۆ تۋرالى ونىڭ تۋىس اعاسى مالىمەت بەرگەن. بۇل تۋرالى tengrinews.kz  حابارلادى. 

نۇرداۋلەت بالعىنبايدىڭ ايتۋىنشا، ابىلاي ءوز ءۇيىنىڭ تۇڭعىشى، سوڭىنان ەرگەن قارىنداسى جانە ءۇش باۋىرى بار. جاۋىنگەردىڭ وتباسى شىمكەنت قالاسىنىڭ ماڭىنداعى قاينار اۋىلىندا تۇرادى.

– بۇگىن تاڭەرتەڭ ونىڭ اتا-اناسىن بادامنىڭ ءتارتىپ ساقشىلارى الىپ كەتتى. ولاردان جاۋاپ الۋ ءۇشىن الىپ كەتكەن بولۋى كەرەك. ابىلايدىڭ اتا-اناسى جۇمىس ىستەمەيدى، ءۇي شارۋاسىنداعى ادامدار. سونىمەن قاتار، ونىڭ قۇرىلىستا جۇمىس ىستەيتىن تاعى ءبىر باۋىرى بار، – دەدى نۇرداۋلەت بالعىنبايەۆ. 

نۇرداۋلەتتىڭ سوزىنشە، ابىلايدىڭ ارناۋلى ورتا ءبىلىمى بار. 2015 جىلى شىمكەنتتەگى اۆتوتەحنيكالىق كوللەدجدى بىتىرگەن. سونداي-اق ول ابىلايدىڭ بادامداعى اسكەري بولىمدە ءبىراز جىل قىزمەت ەتكەنىن جانە ونىڭ ادامدارمەن ەشقاشان جانجالعا كەلمەگەنىن ايتتى. 

– ول وتە اشىق-جارقىن، جاقسى جىگىت. ەشكىممەن قاتتى جانجالعا كەلگەن ەمەس. سوڭعى رەت ونىمەن سويلەسكەنىمدە، رەنىش تۋرالى اڭگىمە بولعان جوق. نەگىزى ءوز پروبلەمالارىن مەنىمەن بولىسكەن ەمەس. ءبىز ايتارلىقتاي ءجيى سويلەسىپ تۇرمايتىنبىز. ءقازىر عالامتوردا اعام تۋرالى اڭگىمەلەر تاراپ جاتىر. سوڭعى ءبىر تاۋلىك ىشىندە ول مەنىمەن بايلانىسقا شىققان جوق، – دەدى نۇرداۋلەت.

سونداي-اق ابىلايدىڭ مىنەزى تۋرالى ونىڭ سىنىپتاسى دا ايتتى. 

– ءيا، ءبىز مەكتەپتە بىرگە وقىدىق. ول مەنىڭ سىنىپتاسىم. وتە سابىرلى، ەشقاشان توبەلەسكە ارالاسپاعان، 4 پەن 5-كە وقىعان بالا ەدى. ونىڭ ەشقانداي وزگەشەلىگى بولعان جوق جانە اسكەري بولىمدە قىزمەت ەتىپ جۇرگەنىن ەستىدىم، – دەدى سىنىپتاسى.