شىعىس قازاقستان وبلىسىنىڭ اكىمى دانيال احمەتوۆ زايساندا سارىتەرەك اۋىلىنىڭ تۇرعىندارىمەن كەزدەسىپ، ءتۇسىندىرۋ جۇمىستارىن جۇرگىزدى، دەپ حابارلادى وبلىس اكىمىنىڭ باسپا ءسوز حاتشىسى ايگۇل بازاروۆا. 

سارىتەرەك اۋىلىنىڭ تۇرعىندارى كەشە، 19 اقپاندا ساعات 15:00-دە اۋىلدىڭ امبۋلاتوريانىڭ الدىنا نارازىلىققا شىققان. جينالعان حالىق جەرگىلىكتى بيلىكتەن كوروناۆيرۋسقا تەكسەرەتىن ورىندى اۋىلدىڭ امبۋلاتورياسىندا ۇيىمداستىرماۋ جانە وبلىسقا جۇمىس ىستەۋگە كەلگەن جۇڭگو ازاماتتارىن ەلدەن شىعارۋ تالاپتارىن قويعان.

باسپا ءسوز حاتشىسىنىڭ ايتۋىنشا، بۇگىن تاڭعى ۋاقىتتا زايسانعا جەتكەن وبلىس اكىمى نارازىلىققا شىققاندارمەن كۇنى بويى 3-4 رەت كەزدەسكەن. كەزدەسۋلەردىڭ قورىتىندىسى بويىنشا وبلىس اكىمى مالىمدەمە جاسادى.

– ايتىلعان ماسەلەنى از ۋاقىت ىشىندە قاراۋىمىز كەرەك. مىنە، بارلىق حالىق تاراتىلدى. بىردە-بىر ماسەلە جوق. ءبىراق قيىن اڭگىمە بولدى. كەلىسىم الدىق. وسى جاعداي بويىنشا قۇرىلعان كوميسسيانى ءوزىم باسقارامىن. قۇرىلعان كوميسسيانىڭ 15 مۇشەسى بار. قاي جاقتا وبسەرۆاسيا ۇيىمداستىرامىز، كەلگەن كىسىلەردى قاي اۋرۋحانالارعا جاتقىزامىز، سودان كەيىن قىتايلىقتارمەن قالاي جۇمىس ىستەيمىز – وسىنىڭ ءبارىن كوميسسيا قاراۋى كەرەك. حالىققا سول شەشىمدى حابارلايمىز، – دەدى وبلىس اكىمى دانيال احمەتوۆ.