دەمپارتيا قۇرۋ بويىنشا ىنتالى توپ جەتەكشىسى، وپپوزيسيالىق ساياساتكەر جانبولات ماماي "رۇحسات ەتىلمەگەن ميتينگىگە شاقىردى" دەگەن ايىپپەن ءۇش تاۋلىككە قامالدى.
قوعام بەلسەندىسىنىڭ زايىبى، جۋرناليست ينگا يمانبايدىڭ facebook پاراقشاسىنا جازۋىنشا، الماتى وبلىسى قاراساي اۋداندىق مامانداندىرىلعان اكىمشىلىك سوتتىڭ بۇل شەشىمى 22 اقپاندا تاڭعى ساعات 5-تە ايتىلعان. وعان دەيىن جانبولات مامايعا ەشكىمدى كىرگىزبەگەن. قۇقىققورعاۋشى جانار بالعابايەۆ دا وپپوزيسيالىق ساياساتكەردىڭ 50-گە جۋىق جاقتاسىمەن بىرگە اۋداندىق ىشكى ىستەر ءبولىمى عيماراتىنىڭ الدىندا كىرە الماي تۇرعان.
پوليسيا كەشە ىنتالى توپ مۇشەسى جانبول راحماتۋللانى ۇستاعان. ماماي مەن ونىڭ جاقتاستارى راحماتۋلاننىڭ سوتى وتەتىن قاراساي اۋداندىق سوتىنا بارعاندا مامايدىڭ ءوزى ۇستالعان.
ارتىنشا دەمپارتيا قۇرۋ بويىنشا ىنتالى توپ جاقتاستارى الماتى وبلىسى قاراساي اۋداندىق ىشكى ىستەر ءبولىمى عيماراتىنىڭ الدىنا جينالا باستادى. ولار جانبولات مامايدى بوساتۋدى تالاپ ەتىپ، 10 شاقتى ازامات توتەنشە شارا رەتىندە اشتىق جاريالادى.
بۇگىن دەموكراتيالىق پارتيا باستاماشىل توبى مۇشەلەرىنىڭ ءبىرى سايلاۋ لەپەسوۆتىڭ قامالعانى تۋرالى اقپارات شىقتى.
19 اقپاندا ماماي باستاعان "دەمپارتيا" ىنتالى توبىنىڭ وكىلدەرى 22 اقپانعا جوسپارلانعان قۇرىلتاي سەزد وتپەيتىنىن، ونىڭ ورنىنا سول كۇنى ميتينگىگە شىعاتىنىن ايتقان. ال 20 اقپاندا جانبولات ماماي ازاماتتاردى 22 اقپان كۇنى الماتىداعى "استانا" الاڭىنا ميتينگىگە كەلۋگە شاقىرعان بولاتىن.
ىنتالى توپ جەتەكشىسىنىڭ جاقتاستارى الەۋمەتتىك جەلىلەردە بۇگىن ميتينگى بولاتىنىن، "جانبولات مامايدى بوساتۋىن تالاپ ەتەتىندەرىن" حابارلاۋدا.
پىكىر قالدىرۋ