قازاقستاننىڭ باس سانيتارلىق دارىگەرى وڭتۇستىك كورەيادا كوروناۆيرۋستىڭ ەپيدەميولوگيالىق جاعدايى ناشارلاسا، ەلدە بۇدان دا قاتاڭ شارالاردى قولدانادى.  بۇل تۋرالى دەنساۋلىق ساقتاۋ ءمينيسترى ەلجان ءبىرتانوۆ ب ا ق وكىلدەرىمەن كەزدەسۋدە ايتتى.

– ءبىز وڭتۇستىك كورەياداعى جاعدايدى قاداعالايمىز. وتكەن تاۋلىك ىشىندە ءوسىم الدىڭعى كۇنمەن سالىستىرعاندا شامامەن 48% قۇرادى. بۇل وتە جوعارى قارقىن. وكىنىشكە وراي، ءوسۋ تەندەنسياسى بار. قىتايدا ءوسۋدىڭ ەڭ جوعارى قارقىنى تاۋلىگىنە 65-70% بولدى. سوندىقتان جاعداي ناشارلاسا جانە پاسيەنتتەر سانىنىڭ ءوسۋ ءقاۋپى تونەتىن بولسا، ءبىز تاعى دا باتىل شارالار قولدانامىز، – دەدى ءبىرتانوۆ.

ونىڭ ايتۋىنشا، وڭتۇستىك كورەيادا 30 مىڭ قازاقستان ازاماتى بار. ەگەر ولاردىڭ 25 مىڭى ورالعىسى كەلسە، وندا مەديسينالىق مەكەمەلەردە پاسيەنتتەرگە ارنالعان ورىندار جەتىسپەۋى مۇمكىن.

– 25 مىڭ ادام ەلگە ورالعىسى كەلەدى دەلىك. بۇل ۇلكەن كورسەتكىش. بۇگىندە ءبىزدىڭ جۇقپالى اۋرۋلار ەمحانالارىندا 7 مىڭعا جۋىق رەزەرۆتىك ورىن بار. ال، مەديسينالىق مەكەمەلەردە شامامەن 3500 ادام كارانتينگە شىعا الادى. ەگەر بۇل كورسەتكىشتەن اسىپ كەتسە، ونىمەن قاتاڭ جۇمىس جاسايمىز، ءبىزدىڭ دە ءوز ادىس-تاسىلدەرىمىز بار، – دەدى مينيستر.

ول قازاقستان كوروناۆيرۋسپەن اۋىراتىن جالعىز ەلدەن الىس ەكەنىن ايتتى.