COVID-2019 كوروناۆيرۋسىنان تۋىنداعان ەپيدەميانىڭ تارالۋىنا بايلانىستى ق ر باس سانيتارلىق دارىگەرىنىڭ قاۋلىسىمەن ەپيدەميالىق قولايسىز ەلدەردىڭ ساناتتارى جاڭارتىلدى. بۇل تۋرالى نۇر-سۇلتاندا وتكەن بريفينگ بارىسىندا قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى.

ق ر سىرتقى ىستەر مينيسترلىگى قازاقستان ازاماتتارىنا ءبىرىنشى ساناتتاعى ەلدەرگە بارۋدان باس تارتۋعا شاقىرىپ، ەكىنشى ساناتتاعى ەلدەرگە جوسپارلانعان ساپارلارىن مۇمكىندىگىنشە كەيىنگە شەگەرۋدى ۇسىندى. قازىرگى ۋاقىتتا جوعارىدا اتالعان ساناتتارداعى ەلدەردە جۇرگەن قازاقستان ازاماتتارىن بارلىق مەديسينالىق ساقتىق شارالارىن ساقتاپ، سونداي-اق ەلگە ورالعاننان كەيىن ق ر دەنساۋلىق ساقتاۋ مينيسترلىگىنىڭ كارانتيندىك رەجيمدى ساقتاۋ جونىندەگى ۇسىنىمدارىن ۇستانۋ قاجەتتىگىنە نازار اۋداردى.

سونداي-اق مينيسترلىك تۋريستتىك فيرمالار، ۇيىمدار مەن كومپانيالاردى ءوز تۇتىنۋشىلارى مەن ارىپتەستەرىنە اتالعان ەلدەرگە تۋريستتىك، قىزمەتتىك جانە باسقا دا ماقساتتارداعى ساپارلار شەكتەلگەنىن جەتكىزۋگە شاقىرادى.

كوروناۆيرۋس كەڭ تارالعان ەلدەردەگى قازاقستان ازاماتارىنا قاتىستى بىرنەشە شارا قولعا الىنۋدا.

– ءبىزدىڭ سەۋلداعى ەلشىلىك تاراپىنان ازاماتتارىمىزدى وڭتۇستىك كورەياداعى كوروناۆيرۋسقا قاتىستى اقپاراتتاندىرۋ بويىنشا ءبىرقاتار شارالار قابىلدادى. ديپلوماتتارىمىز وتانداستارىمىزبەن مەسسەندجەر، الەۋمەتتىك جەلىلەر ارقىلى بايلانىس ورناتىپ، قاجەتتى اقپاراتتى رەسمي ينتەرنەت-رەسۋرستاردا ورنالاستىرۋ ارقىلى جانە تەلەفون ارقىلى حابارلاۋدا، –  دەدى مينيسترلىك وكىلى.

ايبەك سمادياروۆتىڭ ايتۋىنشا، جەدەل شتاب، WhatsApp مەسسەندجەرىندە ارنايى چات قۇرىلىپ، تاۋلىك بويى جەدەل جەلى تەلەفونى جۇمىس ىستەۋدە. قازاقستان ازاماتتارىن كونسۋلدىق ەسەپكە الۋ جۇمىسى كۇندەلىكتى جۇرگىزىلىپ جاتىر.

بۇگىنگى تاڭدا وڭتۇستىك كورەيادا قازاقستاننىڭ 35 مىڭنان استام ازاماتى بار، ونىڭ ىشىندە شامامەن 12 مىڭ ادام زاڭسىز جۇرگەندەر. ال كونسۋلدىق ەسەپتە نەبارى 848 ادام تۇر.

–  بەلگىلى بولاتىنداي، 1 ناۋرىزدان باستاپ قازاقستان مەن وڭتۇستىك كورەيا اراسىنداعى رەيستەر قىسقارتىلاتىن بولادى. وسىعان بايلانىستى، وڭتۇستىك كورەيادا جۇرگەن ازاماتتارىمىزدى وسى شەكتەۋ كۇشىنە ەنگەنگە دەيىن ەلگە ورالۋعا شاقىرامىز.

قازاقستاننىڭ يتالياداعى ەلشىلىگىندە دە جەدەل شتاب قۇرىلىپ، ول ءبىزدىڭ ازاماتتارىمىزدى مەسسەندجەر مەن الەۋمەتتىك جەلىلەر ارقىلى، ەلشىلىكتىڭ رەسمي سايتى مەن جەدەل جەلى تەلەفوندارى ارقىلى اقپاراتتاندىرىپ وتىرادى، –  دەدى ول.

مينيسترلىك مالىمەتىنشە، يتاليادا ءقازىر 1800-گە جۋىق ق ر ازاماتى تۇرادى. ولاردىڭ 673 عانا كونسۋلدىق ەسەپكە تۇرعان. سوڭعى اقپاراتقا سايكەس، ۆيرۋس جۇقتىرعاندار اراسىندا قازاقستان ازاماتتارى جوق.

–  يرانداعى قازاقستان ديپلوماتتارى دا ەلدەگى ەپيدەميالىق جاعدايدى باقىلاۋدا جانە بارلىق ازاماتتارىمىزبەن بايلانىستا. ۆيرۋس جۇقتىرعاندار اراسىندا قازاقستان ازاماتتارى جوق. قازىرگى ۋاقىتتا يران اۋماعىندا 170 ازاماتىمىز ۋاقىتشا تۇرۋدا. كونسۋلدىق ەسەپتە 119 ازاماتىمىز بار. ءار دۇيسەنبى سايىن تەگەران –  الماتى –  تەگەران رەيسى قاتىناپ كەلدى. قازىرگى ۋاقىتتا اۋە قاتىناسى توقتاتىلدى، –   دەپ ايتتى مينيسترلىك وكىلى.