الەۋمەتتىك جەلىدە 25 اقپاندا نۇر-سۇلتانداعى تەرگەۋ اباقتىسىندا جۇمباق جاعدايدا قايتىس بولعان قوعام بەلسەندىسى دۋلات ءاعادىلدىڭ دەنەسىندە "ازاپتاۋ بەلگىلەرى بار" دەگەن ۆيدەو تارادى.   ءاعادىلدىڭ ادۆوكاتى باۋىرجان ازانوۆ الەۋمەتتىك جەلىدە تاراپ جاتقان ۆيدەوعا بايلانىستى ءوزىنىڭ facebook پاراقشاسىندا مالىمدەمە جاسادى.

ازانوۆتىڭ سوزىنشە، ول ءاعادىلدىڭ قازاسىن ەستي سالا نۇر-سۇلتان قالاسىنداعى مارقۇمنىڭ دەنەسى جەتكىزىلگەن ءمايىتحاناعا بارعان. ەسىك اۋزىندا تۇرعان كۇزەت ونى باسىندا ءبىرازعا دەيىن ىشكى كىرگىزبەگەن. ارتىنشا تەرگەۋشى شىعىپ، ىشكە كىرگىزگەن.

ادۆوكات ىشكە كىرگەندە ءاعادىلدىڭ دەنەسى كەسىلىپ قويعانىن كورگەن. مارقۇمنىڭ ىشكى ورگاندارىن عانا كوردىم دەگەن ول مامان بولماعاندىقتان ىشكى ورگاندارعا سىرتقى اسەردىڭ بولعان، بولماعانىن بىلە المادىم دەيدى.

– سوندىقتان مەن تەرگەۋشىدەن تاۋەلسىز ماماندار مەن ساراپشىلاردى تاپپايىنشا ءمايىتتى سويۋدى توقتاتا تۇرۋدى تالاپ ەتتىم. كەلەسى كۇنى ادام قۇقىعى مەن زاڭدى قاداعالاۋ جونىندەگى قازاقستانداعى حالىقارالىق بيۋرو تاۋىپ بەرگەن ساراپشىلار ارنايى كوميسسيا قۇرامىنا قوسىلىپ، اشىلىپ قويىلعان ءمايىتتى زەرتتەۋگە قاتىستى.

مەن سىرتتان باقىلاپ تۇردىم، كورگەندەرىمدى قۇجات جۇزىندە راسىمدەۋدى سۇرادىم. مايىتتەن الكوگول ءيسىنىڭ شىققانىن سەزبەدىم. سول جەردە دۋلاتتىڭ تۋعان باۋىرى باسىنان اياعىنا دەيىن بولدى، –  دەيدى ول.

ازانوۆتىڭ جازۋىنشا، ەگەر فوتو مەن ۆيدەوداعى دارىگەرلەر ايتقانداي قازادان كەيىن 2-3 كۇندە پايدا بولاتىن مايىتكە ءتان داقتار ەمەس، شىنىمەن دە جاراقات بولسا، ولىمگە سوقتىرعان ازاپتاۋدىڭ دالەلى بولسا، وندا كىسى ءولىمى دەرەگى بويىنشا قىلمىستىق ءىس قوزعاۋعا، كىنالىلەردى جازالاۋعا ارىز تۇسىرۋگە بولادى.

ءبىراق ول ءۇشىن كەشە جەر قوينىنا تاپسىرىلعان مارقۇمنىڭ ءقابىرىن اشۋعا تۋرا كەلەدى. وعان مارقۇمنىڭ جاقىندارى كەلىسىم بەرۋى كەرەك. 

– مەنى ءقابىردى اشۋدى تالاپ ەتەتىن جاعدايعا تاپ قىلدى، ءبىراق بۇل تەك تۋىستارىنىڭ رۇقساتى بويىنشا عانا جاسالادى، – دەيدى ازانوۆ. 

ادۆوكات الەۋمەتتىك جەلىدە تاراعان ۆيدەوداعىداي ءاعادىلدىڭ دەنەسىندە راسىمەن كوگەرگەن بەلگىلەر بولعان بولسا، جاقىندارى نەگە ونى كەشە جەرلەۋ الدىندا وزىنە ايتپاعانىنا قاپالى. ونىڭ سوزىنشە، فوتو مەن ۆيدەونى جاريالاعاندار مارقۇمنىڭ جاقىندارىنان رۇقسات سۇراماعان.

– ەگەر ماعان مايىتتەگى جاراقات ىزدەرى تۋرالى ايتقاندا مەن دەرەۋ جەرلەۋ ءراسىمىن توقتاتىپ، تەرگەۋشىلەردەن مايىتكە قوسىمشا زەرتتەۋ جۇرگىزۋلەرىن تالاپ ەتەر ەدىم. ءبىراق ماعان ول جونىندە ەشكىم ايتپادى. جەرلەۋدەن كەيىن فوتو مەن ۆيدەو شىعىپ وتىر. بۇل قيسىنعا كەلمەيدى. ءبارى شىندىققا جەتكىسى كەلەدى، ونىڭ ىشىندە مەن دە بارمىن. ەگەر كىسى ءولىمى قاساقانا بولعان بولسا، جەرلەۋدى توقتاتىپ، تەرگەۋ شارالارىن جاساپ، كوڭىلدەگى كۇدىكتى سەيىلتۋ كەرەك ەدى. ءقابىردى اشىپ، مايىتتەن ازاپتاۋ بەلگىلەرىن تاپساق، كىسى ولتىرگەندەردى تابۋ وڭاي بولار ەدى،  –  دەيدى ازانوۆ.

پوليسيا ۇيىنەن كۇشتەپ اكەتكەن بەلسەندى 43 جاستاعى دۋلات ءاعادىلدىڭ نۇر-سۇلتاننىڭ تەرگەۋ اباقتىسىندا قايتىس بولعانى تۋرالى حابار اقپاننىڭ 25ء-ى كۇنى تۇستەن كەيىن بەلگىلى بولعان. نۇر-سۇلتان پوليسيا دەپارتامەنتىنىڭ الدىن الا دەرەگى بويىنشا، بەلسەندى ءاعادىل "جۇرەك تالماسىنان" كوز جۇمعان. بەلسەندىلەر مەن ءاعادىلدىڭ تانىستارى ونىڭ جۇرەگى اۋىرماعانىن ايتادى.

♦ وقي وتىرىڭىز: دۋلات ءاعادىلدىڭ اناسى: ازانوۆقا ەش رەنجىمەيمىن، تەك مازالاماسا ەكەن (ۆيدەو)