بۇل تۋرالى قازاق كۇرەسى فەدەراسياسىنىڭ ءبىرىنشى ۆيسە-پرەزيدەنتى ارمان شورايەۆ ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ايتتى، دەپ حابارلايدى Qamshy.kz اقپارات اگەنتتىگى. 

«بىلتىر قىركۇيەك ايىندا ابىلاي حان بابامىزعا ارنالعان ەلىمىزدە ۇلكەن مونۋمەنت بوي كوتەرسە دەگەن يدەيامەن بولىسكەن ەدىم. الەۋمەتتىك جەلىلەردە بۇل تاقىرىپ بويىنشا قىزۋ تالقىلاۋ بولىپ، سول جەردە ازاماتتاردىڭ 95 پايىزى قولداۋ ءبىلدىردى دەپ ايتسام وتىرىك ەمەس. سونىمەن قاتار، مەملەكەت باسشىلىعى تاراپىنان قولداۋعا يە بولدىق. بۇگىن ۇسىنىلىپ وتىرعانى باستاپقى كەسكىن دەپ ايتۋعا بولادى»، - دەدى ارمان شورايەۆ.

"باستاپقى كەسكىن" دەمەكشى، ابىلايحان مونۋمەنتىنىڭ ەسكيزدىك جوباسى دا دايىن بولعان. ونى ساۋلەتشى  —  ايدار جامحان جاساعان. ال جوباعا كەتەتىن قوماقتى قاراجاتتى حالىقتان جيناۋ جاعى دا قاراستىرىلعان.

«بۇكىل حالىق بولىپ وسى مونۋمەنتتى قويۋدى ءجون كوردىك. ال جوباعا  $5-7 ميلليون قاجەت جانە ول قاراجاتتى اسارلاتىپ، حالىق بولىپ، كاسىپكەر جىگىتتەر بولىپ جينايمىز»، - دەدى قوعام قايراتكەرى.

ابىلايحان بەينەسىندەگى عيماراتتىڭ سالىناتىن ورىنى دا كوپ تالقىعا تۇسكەن، اقىرىندا جوبا اۆتورلارى اقىلداسا كەلىپ ونى ابىلايحاننىڭ ءوزى وردا تىككەن بۋراباي مەن كوكشەتاۋدىڭ اراسىنداعى كەنەسارى دەگەن اۋىلدىڭ جانىنان سالۋدى ۇيعارعان.

«بىرەۋلەر بابامىزدىڭ بەينەسىندەگى عيماراتتى ۇلىتاۋدا، ەندى بىرەۋلەر الماتى مەن سەمەيدە قويۋدى ۇسىندى. ويلانا كەلە، ءبىز ابىلايحان ءوز ورداسىن تىككەن بۋراباي مەن كوكشەتاۋدىڭ اراسىنداعى كەنەسارى دەگەن اۋىلدىڭ جانىنان سالامىز دەپ شەشتىك. ەسكەرتكىشتىڭ ىرگەتاسى رەتىندە پايدالانىلاتىن عيماراتتا مۇراجاي ەكسپوزيسياسى، كونفەرەنس-زال، كورمە زالى جانە تاعى باسقالارى ورناتىلادى. كوكشەتاۋ ابىلايحاننىڭ ەسىمى عانا ەمەس. وندا ءبىرجان سال، اقان سەرى، شوقان بابامىز بار. مۇنداي جوبالار رەسپۋبليكانىڭ بارلىق جەرىندە بولۋى ءتيىس، وسى ارقىلى ىشكى ءتۋريزمدى دامىتا الامىز»، - دەدى ول.

شارا سوڭىندا ادەتتەگىدەي سۇراقتار قويىلدى. سونىڭ ىشىندە جۋرناليستەردىڭ «بۇل باستاما موڭعوليادا  شىڭعىس حانعا ارنالعان ەسكەرتكىشتىڭ كوشىرمەسى ەمەس پە؟» دەگەن ساۋالىنا قازاق كۇرەسى فەدەراسياسىنىڭ ءبىرىنشى ۆيسە-پرەزيدەنتى بۇل جوبانى پرەزيدەنتتىڭ ءوزى قولداپ وتىرعانىن جەتكىزدى.

«ءسىز ايتىپ وتىرعان، شىڭعىس حاننىڭ مونۋمەنتىنە $5 ملن جۇمسالدى. حالىق شاماسى جەتكەنشە بەرسە، قالعانىن قازاقتىڭ ەلىم، جەرىم دەگەن ۇلتشىل ازاماتتارى كوتەرىپ الادى. مەن مۇنى بۇعان دەيىن قازاق  بارىسىنداعى تاجىربيەمنەن بىلەمىن. ال مەملەكەت بىزگە تەك جەر مەن ينفراقۇرىلىم جاعىنان قولداۋ كورسەتسە بولدى. بۇل جوبانى پرەزيدەنتىمىز ق.ج.توقايەۆتىڭ ءوزى قولداپ وتىر. الداعى ءۇش جىلدا بابامىزدىڭ بەينەسىندەگى عيمارات سالىنىپ بىتەدى»، - دەدى ا. شورايەۆ.

ايتا كەتەيىك، ابىلايحان بەينەسىندەگى عيماراتتى تۇرعىزاتىن ماماندى حالىقارالىق كونكۋرس ارقىلى تاڭداماق. ول ءۇشىن كوميسسيا مۇشەلەرىنىڭ قاتارىنا م.اشىمبايەۆ، م.اۋەزوۆ، ت.جۇرتباي، ق.مىڭباي، د.جولجاقسىنوۆ، ب.ۋالييەۆ، ت.قاجىبايەۆ، م.مانسۇروۆ پەن ز.كابۋلدينوۆ كىرگىزىلىپ وتىر.