"اشىق نقا" پورتالىندا قىلمىستىق كودەكس پەن اكىمشىلىك قۇقىقبۇزۋشىلىق تۋرالى كودەكسە ەنەتىن تۇزەتۋلەردىڭ جوباسى جاريالاندى. وعان سايكەس قىلمىستىق كودەكستەن جالا جابۋ بابى الىنىپ تاستالىپ، ايىپپۇل سوماسى تومەندەتىلمەك.
اكىمشىلىك قۇقىقبۇزۋشىلىق تۋرالى كودەكس قوسىمشا – 73-3 بابىمەن تولىقپاق. پۋنكتتەگى 1 باپتا "ابىروي-بەدەلگە نۇقسان كەلەتىن نەمەسە رەپۋتاسيانى بۇزۋعا اكەلىپ سوقتىرعان قاساقانا جالعان دەرەك تاراتقانى ءۇشىن جەكە تۇلعاعا 160 ايلىق ەسەپتىك كورسەتكىش تۇرىندەگى ايىپپۇل سالىنادى نەمەسە 15 تاۋلىككە قامالادى" دەلىنگەن. لاۋازىم يەسىنە 550 اەك مولشەرىندە ايىپپۇل نەمەسە 20 تاۋلىككە قاماۋ جازاسى قاراستىرىلعان.
2 باپتا پۋبليكا الدىندا نەمەسە بۇقارالىق اقپارات قۇرالدارىن، تەلەكوممۋنيكاسيالىق جەلىلەردى پايدالانۋ ارقىلى جالعان دەرەكتەر تاراتقانى ءۇشىن جەكە تۇلعا ءۇشىن 180 اەك كولەمىندەگى ايىپپۇل سالۋ نەمەسە 20 تاۋلىككە قاماۋ، لاۋازىمدى تۇلعا ءۇشىن 650 مىڭ اەك كولەمىندەگى ايىپپۇل نەمەسە 25 تاۋلىككە قاماۋ قاراستىرىلعان.
سونداي-اق قىلمىستىق كودەكستەگى 174-باپتى وزگەرتۋ مەن تولىقتىرۋ ۇسىنىلىپ وتىر. وعان سايكەس "قوزدىرۋ" ءسوزى "جاعۋ" سوزىمەن الماستىرىلماق. بۇل باپ بويىنشا 2 مىڭنان 7 مىڭعا دەيىنگى اەك مولشەرىندەگى ايىپپۇل نەمەسە 2 جىلدان 7 جىلعا دەيىن باس بوستاندىقتان ايىرۋ كوزدەلگەن.
تۇزەتۋدى تالقىلاۋ 16 ناۋرىزعا دەيىن جالعاسادى.
پىكىر قالدىرۋ