ءماجىلىس دەپۋتاتى بەكبولات تىلەۋحان ەكپە الماعان بالالاردى بالاباقشاعا قابىلداماۋدى زاڭمەن بەكىتۋگە قارسى شىقتى، دەپ حابارلايدى  Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

بۇگىن ماجىلىستە "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكس جوباسى ءبىرىنشى وقىلىمدا قارالدى. اتالعان قۇجاتتا بالالارعا كەيبىر اۋرۋلارعا قارسى ەكپە سالدىرۋ مىندەتتى دەپ كورسەتىلگەن. ەكپە سالىنباعان بالالاردى بالاباقشاداعى ۇجىمدىق يممۋنيتەتتىڭ جوعارى دەڭگەيى ساقتالعان جاعدايدا عانا الۋعا رۇقسات بەرىلەدى. 

ءماجىلىس دەپۋتاتى بەكبولات تىلەۋحان قوعامدا داۋ تۋعىزعان باپپەن كەلىسپەيتىنىن جاسىرمادى.

"مەن سايلاۋشىلارىمنىڭ اماناتىن جەتكىزە وتىرىپ، وسى 89-باپقا قارسى شىعاتىنىمدى جەتكىزگىم كەلەدى. جۇمساق كۇش، يلاندىرا ءتۇسىندىرۋ ادىسىمەن كوندىرۋدىڭ ورنىنا باس كوز جوق "مىندەتتى" دەپ زاڭعا قوندىرىپ، تىزەگە سالۋدىڭ قانداي رەتى بار؟ ۇكىمەت كۇشىنە سەنبەي مە، الدە ەرىنە مە؟" دەدى ول.

دەپۋتات جالپى ۆاكسيناعا قارسى ەمەس ەكەنىن، بالالارىنا سالدىراتىنىن ايتتى. ءبىراق مۇنىڭ نەگە زاڭمەن مىندەتتەلىپ وتىرعانى تىلەۋحانعا تۇسىنىكسىز.

"باس پروكۋراتۋرادان سۇرايتىنىم، باس تارتقان ادام ءىس جۇزىندە زاڭ بۇزۋشى بولىپ شىعا كەلە مە؟ كونستيتۋسيانىڭ 29-بابىنا قايشى كەلمەي مە؟ ءار ادام ءوزىنىڭ دەنساۋلىعىن قورعاۋعا قۇقىعى بار. ماعان تۇسىندىرىڭىزدەرشى، ماعان تۇسىندىرە الماساڭىزدار، قوعامعا تۇسىندىرۋگە وتە قيىن بولادى. نەگە ءبىز مىندەتتەۋىمىز كەرەك؟" دەدى ماجىلىسمەن.

باس پروكۋروردىڭ ورىنباسارى مارات احمەتجانوۆ مۇنىڭ اتا زاڭعا قايشى ەمەس ەكەنىن مالىمدەدى.

"ەگەر ادامنىڭ ومىرىنە، دەنساۋلىعىنا ءقاۋىپ بولسا، باسقا زاڭمەن ونىڭ قۇقىعىن، ياعني، ءبىلىم الۋ، ەڭبەك ەتۋ قۇقىعىن شەكتەۋگە مۇمكىندىك بار. سەبەبى، بىزدە ادامنىڭ ءومىرى مەن دەنساۋلىعى ەڭ قۇندى دەپ ەسەپتەلەدى. سوندىقتان، كونستيتۋسياعا قايشى ەمەس" دەپ جاۋاپ بەردى ول.

ال دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، مىندەتتى ۆاكسيناسيانى ەنگىزۋدەگى ماقسات – ينفەكسيالىق اۋرۋلاردان باسقا ازاماتتاردىڭ دەنساۋلىعىن قورعاۋ.

"سەبەبى قازىرگى كۇندە اتا-انالاردىڭ ەكپەدەن باس تارتۋىنىڭ سالدارىنان ەلىمىزدە بۇرىننان ۇمىتىلعان ينفەكسيالىق اۋرۋلار قايتىپ كەلىپ جاتىر. ءبىراق ودان تەك قانا سول بالالار ەمەس، باسقا دا كوپتەگەن مەديسينالىق اۋرۋمەن اۋىراتىن بالالار اۋىرىپ ولۋدە. ءبىراز مەملەكەتتە كەيبىر ۆاكسينالاردى سالۋ زاڭمەن مىندەتتەلگەن. ءبىزدىڭ دە كوزدەگەنىمىز وسى" دەدى ول.

ءماجىلىس دەپۋتاتتارى زاڭ جوباسىن ءبىرىنشى وقىلىمدا ماقۇلدادى.