قازاقستاندا توتەنشە جاعداي كەزىندە قاشىقتان جۇمىس ىستەۋ مۇمكىندىگى بار بارلىق كاسىپورىندار مەن مەكەمەلەر وسى رەجيمگە اۋىسۋعا مىندەتتى. بۇل تۋرالى قازاقستاننىڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى. 

نۇرىمبەتوۆتىڭ سوزىنشە، ەڭبەك كودەكسىنە ساي، كاسىپورىندار مەن مەكەمەلەر قاشىقتان جۇمىس ىستەۋ رەجيمىنە كوشكەن جاعدايدا جۇمىس بەرۋشى جۇمىسشىعا ءدال بۇرىنعىداي جالاقى تولەۋگە ءتيىس. 

– قاشىقتان جۇمىس ىستەۋ رەجيمىنە كوشكەندە، ەڭبەكاقى تولەۋ ءتارتىبى وزگەرمەيدى. بۇل جەردە ازامات ءوزىنىڭ جۇمىس ورنىندا ەمەس، ۇيدەن جۇمىس اتقارۋ مۇمكىندىگى بولادى. ەڭبەك كودەكسى بويىنشا، وعان جۇمىس بەرۋشى ءتيىستى جاعداي جاساۋعا مىندەتتى جانە جالاقىسى اي سايىنعى الىپ جۇرگەن كولەمدە تولەنەتىن بولادى، – دەدى نۇرىمبەتوۆ.

ءمينيستردىڭ ايتۋىنا قاراعاندا، توتەنشە جاعداي كەزىندە جۇمىس كولەمى شەكتەلەتىندەي بولسا، جۇمىس بەرۋشىلەر وزدەرىنىڭ بۇيرىعىمەن قىسقارتىلعان جۇمىس رەجيمىنە كوشۋگە قۇقىلى. ولاي بولعان جاعدايدا، جۇمىسشىلار جۇمىس ىستەگەن ساعاتىنا قاراي ەڭبەكاقى الاتىن بولادى. 

– ەگەر دە جۇمىس كولەمى شەكتەلەتىن بولسا، جۇمىس بەرۋشىلەر وزدەرىنىڭ بۇيرىعىمەن قىسقارتىلعان جۇمىس رەجيمىنە كوشۋگە قۇقىلى. مۇندا اپتاداعى جۇمىس كۇندەرىنىڭ سانى نەمەسە ءبىر كۇندەگى اتقارىلاتىن جۇمىس ساعاتى ازايۋى مۇمكىن. نەمەسە جۇمىس كۇنىمەن بىرگە، ساعات تا ازايۋى ىقتيمال. بۇل جاعدايدا جۇمىس ىستەپ جۇرگەن ازاماتتار ساعاتىنا قاراي ەڭبەكاقى الاتىن بولادى. ياعني، مىسالى اپتاسىنا جۇمىس كۇنى بەس كۇننەن ءۇش كۇنگە قىسقارتىلسا، اپتاسىنا ءۇش كۇندىك جالاقىنى الادى. نەمەسە ءبىر كۇندە سەگىز ساعاتتىڭ ورنىنا ءتورت ساعات جۇمىس اتقارىلسا، ءتورت ساعاتتىڭ جالاقىسى مىندەتتى تۇردە تولەنەتىن بولادى. تولىق ەمەس جۇمىس كۇنى ەڭبەك كودەكسىنىڭ 70-بابىمەن رەتتەلەدى، – دەدى مينيستر. 

كەشە قازاقستان پرەزيدەنتى قاسىم-جومارت توقايەۆ COVID-19 كوروناۆيرۋسىنا بايلانىستى ەلدىڭ بارلىق اۋماعىندا 16 ناۋرىز بەن 15 ءساۋىر ارالىعىندا توتەنشە جاعداي جاريالاعان بولاتىن. 

رەسمي دەرەك بويىنشا، قازاقستاندا 10 ادامنان كوروناۆيرۋس تابىلدى.