"ءبىز تاماق ءونىمىنىڭ باعالارىن كوتەرۋگە، الىپ ساتارلىققا جول بەرمەۋ ءۇشىن بارلىق كۇش جىگەرىمىزدى  سالامىز جانە ول ءۇشىن ءتيىستى قۇقىقتارمەن قۇرالدار جەتكىلىكتى". بۇنى ق ر ساۋدا جانە ينتەگراسيا ءمينيسترى باقىت سۇلتانوۆ ورتالىق كوممۋنيكاسيا قىزمەتىنىڭ ونلاين-بريفينگىندە ايتتى.

ونىڭ سوزىنشە، توتەنشە جاعداي كەزىندە ۇكىمەت ازىق-تۇلىكپەن قامتاماسىز ەتۋ بويىنشا بارلىق شارالاردى قابىلداۋدا. الەۋمەتتىك ماڭىزى بار تاۋارلاردىڭ بارلىعى تۇراقتاندىرىلعان. 

– توتەنشە جاعداي رەجيمىندە ەل بولىپ، ورتاق قاۋىپ-قاتەرگە قارسى بىرىگۋىگە ءتيىسپىز. قازىرگى ۋاقىتتا ءبىز الەۋمەتتىك ماڭىزى بار تاۋارلار مەن ازىق-تۇلىكتىڭ شەكتى باعاسىن ەنگىزۋ تەتىگىن جەڭىلدەتىپ جاتىرمىز. بۇل اكىمدىكتەرگە باعالاردىڭ اۋىتقۋلارىنا جەدەل دەن قويۋىنا مۇمكىندىك بەرەدى. جەرگىلىكتى اتقارۋشى ورگاندار شەكتى باعالاردى كوتەرەتىن كاسىپكەرلەرگە ايىپپۇل سالاتىن قۇقىقتارى بار، – دەدى ول. 

سونىمەن قاتار، ول ازاماتتاردىڭ ءومىرى مەن دەنساۋىلعىن قورعاۋ ماقساتىندا ساۋدا نىساندارىنا، قىزمەتتەرىنە ۋاقىتشا شەكتەۋ ەنگىزىلگەنىن اتاپ ءوتتى. 

– ساۋدا ورىندارىندا ادامداردىڭ كوپتەپ جينالۋىنا شەكتەۋلەر قويىلدى. ياعني حالىقتى ازىق-تۇلىكپەن قامتاماسىز ەتۋ شارالارىمەن قاتار ءقاۋىپتى ۆيرۋستى تاراتپاۋ شاراسى دا قولعا الىنىپ وتىر. ءىرى گيپەرماركەتتەر، بازارلار مەن باسقا دا ساۋدا ورىندارى جۇمىس ىستەيدى، الايدا ءبىرقاتار ەرەجەلەردى ساقتاۋلارى كەرەك. بۇگىن ق ر دەنساۋلىق ساقتاۋ مينيسترىمەن بىرگە بۇل نىسانداردى زالالسىزداندىرۋ بويىنشا جيىن وتكىزدىك. باستى ماسەلە دۇكەندەردە كەزەكتىڭ ورىن الۋىن بولدىرماۋ، – دەدى مينيستر. 

مينيستر، سونداي-اق ءىرى ساۋدا ورىندارىنا حالىق بەتپەردەمەن كىرگىزىلەتىنىن، ەگەر بولماسا سول جەردە بەرىلەتىنىن جەتكىزدى. 

– ءىرى ساۋدا ورىندارى ساعات 10.00-دەن 18.00-گە دەيىن جۇمىس ىستەيدى. ال، ازىق-تۇلىك ساتپايتىن بازارلار ساعات 11.00-دەن 17.00-گە دەيىن جۇمىس ىستەيدى. بۇل ساۋدا ورىندارىنىڭ بارلىعىندا سانيتارلىق نورما ساقتالۋى كەرەك، – دەدى ول.