جوعارعى سوتتىڭ باسپا ءسوز حاتشىسى ايدوس ءسادۋاقاسوۆ facebook-تە COVID-19 جاڭا كوروناۆيرۋسىنىڭ پاندەميالىق سيپات الۋىنا بايلانىستى مەملەكەت باسشىسىنىڭ رەسپۋبليكادا توتەنشە جاعداي ەنگىزۋىنە قاتىستى ءبىرقاتار شارالاردى قابىلداعانىن ءمالىم ەتتى.

"1. پروسەستىك مەرزىمدەرى بار سوت ىستەرىن قاراۋ كەيىنگە شەگەرىلدى (سونىڭ ىشىندە توقتاتا تۇرۋ، كەيىنگە قالدىرۋ، مەرزىمدەرىن ۇزارتۋ جانە ت.ب.).
2. سوت پروسەستەرىن اقپاراتتىق تەحنولوگيالاردىڭ كومەگىمەن قاشىقتىقتان جۇرگىزۋ ۇسىنىلادى (بەينەبايلانىس، سونىڭ ىشىندە «TrueConf» ءموبيلدى قوسىمشاسى ارقىلى).
3. رۇقسات ەتۋدىڭ قىسقارتىلعان مەرزىمدەرىنە (تەرگەۋ سوتتارى، جەدەلدەتىلگەن بۇيرىقتىق، كەلىسىلگەن ءىس جۇرگىزۋدەگى جانە ت.ب. ىستەر) بايلانىستى قىلمىستىق ىستەر مەن ماتەريالداردى، ۇكىمدەردى ورىنداۋ تارتىبىندەگى، سونداي-اق ادامداردى ۇستاۋمەن نەمەسە قاماققا الۋمەن بايلانىستى ىستەردى قاراۋدى جوعارىدا اتالعان ۇسىنىمداردى ەسكەرە وتىرىپ، بارىنشا وقشاۋلانعان جانە پروسەسكە قاتىساتىن ادامداردىڭ قاۋىپسىزدىگى جاعدايىندا جۇزەگە اسىرۋ ۇسىنىلادى.
4. رەسپۋبليكانىڭ بارلىق سوتتارىندا ازاماتتاردى جەكە قابىلداۋ توتەنشە جاعداي اياقتالعانعا دەيىن توقتاتىلادى.
5. سوتتارعا ۇكىمەت ۇسىنعان، سونىڭ ىشىندە دەنە تەمپەراتۋراسىن ولشەۋ، گيگيەنالىق جانە زارارسىزداندىرۋ قۇرالدارىن قولدانۋدى كوزدەيتىن الدىن-الۋ شارالارىن قولدانۋ قاجەتتىگى ەسكەرتىلدى.
6. سەمينارلار، كونفەرەنسيالار، جۇمىس وتىرىستارىن وتكىزۋ، سونداي-اق سوت عيماراتتارىنان تىس جەرلەردە وتەتىن ءىس-شارالارعا سۋديالار مەن سوت قىزمەتكەرلەرىنىڭ قاتىسۋى توقتاتىلادى.
7. تۇرعىندارعا، اتقارۋشى جانە قۇقىق قورعاۋ ورگاندارىنا، ادۆوكاتتار قاۋىمداستىعى مەن ب ا ق وكىلدەرىنە تۋىنداعان احۋالعا تۇسىنىستىك تانىتۋدى جانە وتىنىشتەردى/ ىستەر مەن ماتەريالداردى سوتقا بەرۋدى نەعۇرلىم كەيىنگە شەگەرۋدى سۇرايمىز.
جوعارعى سوت اتالعان شەكتەۋلەردى قابىلداي وتىرىپ، ادامنىڭ ءومىرى مەن دەنساۋلىعى ەڭ باستى قۇندىلىق ەكەندىگىن اتاپ وتەدى. قابىلدانىپ وتىرعان شارالار ازاماتتاردىڭ ءومىرى مەن دەنساۋلىعىنا تونەتىن قاۋىپ-قاتەرلەردى بارىنشا ازايتۋعا باعىتتالعان. مۇنداي شارالار الەمنىڭ كوپتەگەن ەلدەرىندە قولدانىلۋدا" دەلىنگەن اقپاراتتىق حابارلامادا.