قازاقستاندا كوروناۆيرۋسقا بايلانىستى ەنگىزىلگەن توتەنشە جاعدايدىڭ ارەكەت ەتە باستاعانىنا ەكىنشى كۇن. توتەنشە شارا كەزىندە مەملەكەتتىك جانە قوعامدىق ورىندار قالاي جۇمىس ىستەيدى، ءجۇرىپ-تۇرۋ مەن وزگە دە كۇندەلىكتى قاجەتتىلىكتەردىڭ جايى قالاي بولماق دەگەن ساۋالداردىڭ جاۋابىن تومەندەگى ماتەريالدان بىلۋگە بولادى.

رەسمي ورىندار جۇمىسى

Nur Otan پارتياسىنىڭ بارلىق قوعامدىق قابىلداۋ بولىمدەرى تۇرعىنداردى جەكە قابىلداۋدى ۋاقىتشا توقتاتتى. ال حالىققا قىزمەت كورسەتۋ ورتالىقتارى شتاتتىق رەجيمدە جۇمىس ىستەي بەرەدى. قىزمەتكەرلەرگە مەديسينالىق ماسكا تاعۋ، انتيسەپتيكتەر قولدانۋ، قولدى ءجيى جۋۋ سياقتى كوروناۆيرۋستان قورعانۋ تالاپتارى قويىلعان. جۇمىس ۋاقىتى ادەتتەگىدەي تاڭعى 9:00-دەن كەشكى 20:00-گە دەيىن.

بالاباقشا مەن جاتاقحانا

قالىپتاسقان جاعدايعا بايلانىستى بالالاردى بالاباقشاعا اپارۋ-اپارماۋ اتا-انالاردىڭ ءوز ەركىندە. ءبۇلدىرشىن بالاباقشاعا بىرنەشە كۇن كەلمەسە دە ونىڭ ورنى ساقتالادى. بالاباقشاداعى ورىندى الىپ قوياتىن نورما ازىرشە توقتاتىلدى. سوندىقتان كوروناۆيرۋسقا بايلانىستى بالا بالاباقشاعا بىرنەشە كۇن كەلمەسە، ورنى تۋرالى ۋايىمداۋعا سەبەپ جوق.

ەلدە 90 مىڭعا جۋىق ستۋدەنت جاتاقحانادا تۇرادى. بۇگىندە سونىڭ 20 مىڭنان استامى جاتاقحانالارىندا قالعان. ولار ول جەردەن شىعارىلمايدى. دەسە دە قاندايدا ءبىر شەكتەۋ قويىلىپ، رەجيم ساقتاۋ بويىنشا جۇمىس جۇرگىزىلمەك. دەسە دە وقۋ ورنىنىڭ ىشكى تارتىبىنە ساي، ستۋدەنتتتەردىڭ ءجۇرىس-تۇرىسىنا تالاپ ءارتۇرلى بولۋى مۇمكىن.

جولاۋشى تاسىمالى

قازاقستان مەن جۇڭگو، وزبەكستان جانە موڭعوليا اراسىندا اۆتوبۋسپەن جولاۋشىلار جانە جۇكتەردى تۇراقتى تاسىمالداۋ توقتاتىلدى. رەسەي مەن قىرعىزستانعا قاتىنايتىن اۆتوبۋستارمەن جانە ميكرواۆتوبۋس رەيستەرى ەكى ەسەگە قىسقاردى.

اۋە قاتىناسى بويىنشا اپتا ىشىندە 49 تۇراقتى حالىقارالىق رەيس پەن 84 حالىقارالىق رەيس قىسقارتىلدى. قازاقستان مەن جۇڭگو، يران، ازەربايجان اراسىنداعى تۇراقتى رەيستەر توقتالدى. 16 ناۋرىزدان قازاقستاندىق Air Astana، Scat اۋە كومپانيالارىنىڭ، شەتەلدىك Turkish Airlines، Fly Dubai، Etihad Airways، Air Arabia، Wizz Air، LOT Polish Airlines، بەلاۆيا اۋە كومپانيالارىنىڭ گەرمانيا، ۇلىبريتانيا، نيدەرلاندى، تۇركيا، ۋكراينا، بەلارۋس، ءباا، گرۋزيا، ءۇندىستان، ۆەنگريا، چەحيا، پولشا سىندى باعىتتارعا 68 تۇراقتى اۋە رەيسى قىسقارتىلدى. سونىمەن قاتار Scat كومپانياسىنىڭ نۇر-سۇلتان-انتاليا، الماتى-انتاليا تۇراقتى رەيستەرى دە قىسقاردى. بۇعان دەيىن «Lufthansa» كومپانياسى قازاقستانعا رەيستەرىن ءوز ەركىمەن توقتاتقان.

بازارلار مەن سۋپەرماركەتتەر

الماتىداعى «التىن وردا»، «وپتوۆكا»، «باراحولكا»، «تاۋ سامالى» جانە تاعى باسقا بازارلار جۇمىسىندا ەش وزگەرىس جوق. تەك «باراحولكاداعى» «ياليان» بازارى 10:00-17:00 ارالىعىندا ىستەيدى.

ازىق-تۇلىك ساتاتىن سۋپەرماركەتتەر مەن گيپارماركەتتەردىڭ كوبى ادەتتەگىدەي رەجيمدە جۇمىس ىستەۋىن جالعاستىرىپ جاتىر. تەك كەيبىر نىساندار ۋاقىتىنان 1 ساعاتقا بۇرىن جابىلۋى مۇمكىن.

ويىن-ساۋىق ورتالىقتارى

توتەنشە جاعداي جاريالانعان العاشقى كۇنى الماتىداعى ويىن-ساۋىق ورتالىقتارىنىڭ ءبىرازى جۇمىس ىستەدى. الايدا 17 ناۋرىزدا Mega Center، Mega Park ساۋدا ۇيلەرى قىزمەتىن مۇلدە توقتاتقانىن حابارلادى. سونداي-اق Globus ورتالىعى دا ۋاقىتشا جابىق. Esentai Mall، Forum ساۋدا ۇيلەرى ءىشىنارا عانا ىستەسە، Aport Mall، Grand Park، Asia Park، Atakent Mall، گالەرەيا، Sputnik، Maxima، Mart، ADK، Moskva سىندى ورتالىقتار 10:00-دەن 18:00 ارالىعىندا ىستەيتىنىن ءمالىم ەتتى. جۇمىس رەجيمىندەگى وزگەرىستەر تۋرالى اقپارات ويىن-ساۋىق ورتالىقتارىنىڭ ينستاگرامداعى پاراقشالارىندا ۇدايى جاريالانۋدا.

ساۋدا نىساندارى اكىمشىلىگىنە «كەلۋشىلەر تەك ماسكامەن عانا جىبەرىلۋگە ءتيىس. كەلۋشىلەردە ماسكا بولماسا، تەگىن ماسكا ۇسىنىپ، كوروناۆيرۋستىڭ الدىن الۋ بويىنشا جادىناما تاراتۋلارى قاجەت. بارلىق كىرىپ-شىعاتىن ەسىكتەرگە تەپلوۆيزورلار ورناتۋلارى كەرەك» دەگەن تالاپ قويىلعان. ويىن-ساۋىق ورتالىقتارىنداعى كينوتەاترلار مەن بالالارعا ارنالعان ويىن الاڭدارى جابىق.

تويحانالاردا توي جاسالا ما؟

توتەنشە جاعداي اياسىندا توي-تومالاق جاساۋعا شەكتەۋ قويىلعان. مەيرامحانالارعا ءبىر اي كولەمىندە تاپسىرىس قابىلداۋعا بولمايدى. قامشى تىلشىسىنە پىكىر بىلدىرگەن «KUANYSH GRAND HALL»، «ديانا» «جەتىسۋ» رەستوراندارىنىڭ قىزمەتكەرلەرى ازىرگە تويعا تاپسىرىس قابىلدانبايتىنىن، توتەنشە جاعداي جاريالانعان 16 ناۋرىز بەن 15 ءساۋىر ارالىعىنا بەلگىلەنگەن جيىن-تويلار كەيىنگە قالدىرىلىپ جاتقانىن ءمالىم ەتتى.

قازاقستان مۇسىلماندارى ءدىني باسقارماسىنىڭ ءپاتۋاسى

قمدب عۇلامالار كەڭەسى ەلدە جاريالانعان توتەنشە جاعدايدى ەسكەرە كەلە مەشىتتەردە جۇما نامازى ۋاقىتشا وقىلمايتىنىن، اركىم ءوز ۇيىندە جۇما نامازدىڭ ورنىنا بەسىن نامازىن وتەيتىنىن ءمالىم ەتتى.

مەشىتتەر جابىلمايدى، بەس ۋاقىت نامازعا ازان شاقىرىلادى، الايدا بەس ۋاقىت ناماز مەشىتتە جاماعاتپەن وقىلمايدى.

مەشىت جانىنداعى اسحانالاردا وتەتىن قۇدايى اس، ساداقالار (جەتىسى، قىرقى، جىلى ت.ب. ءداستۇرلى كادەلەر) ۋاقىتشا توقتاتىلادى.

جانازا نامازىن تەك جاقىن تۋىستارىمەن، ياعني از توپپەن وتكىزگەن ءجون.

توتەنشە جاعداي قاجەت بولعان جاعدايدا ۇزارتىلۋى دا، ەپيدەميولوگيالىق جاعداي ۋشىقپاسا، مەرزىمىنەن بۇرىن دا توقتاتىلۋى مۇمكىن.