كارانتينگە بايلانىستى قويىلعان الماتى كىرەبەرىستەرىندەگى 27 بلوك بەكەتتىڭ ءبىرى مەگاپوليستىڭ باتىس جاعىنداعى التىن وردا بازارىنىڭ ماڭىنا قويىلعان.

ارنايى تەمىر قورشاۋمەن قورشالعان بلوك بەكەتتە ءۇش وتكەل بار. ءبىرىنشىسى قالاعا جەكە كولىكپەن كىرۋشىلەرگە، ەكىنشىسى قالاعا جاياۋ كىرۋشىلەرگە، ءۇشىنشىسى قالادان شىعۋشىلارعا ارنالعان.

قالادان شىعۋعا ەش كەدەرگى جوق. كولىكپەن دە، جاياۋ دا شىعۋعا بولادى. قاراساي، جامبىل اۋدانىنا قاتىنايتىن قوعامدىق كولىكتەر ادەتتەگىدەي ءجۇرىپ تۇر.

ال قالاعا الماتىدا تۇراقتى تىركەۋى بارلان عانا كىرگىزىلىپ جاتىر. كىرەبەرىستە پوليسيا قىزمەتكەرلەرى ازاماتتاردىڭ قالالىق تىركەۋلەرىن تەكسەرىپ، مەديسينا قىزمەتكەرلەرى ارنايى قۇرالمەن كىرۋشىلەردىڭ قىزۋىن ولشەۋدە. ءار ادام جەكە-جەكە تەكسەرىلىپ جاتىر. سونىڭ سالدارىنان قالاعا كىرەبەرىستە ۇزىن-سونار كەزەك. كولىك كەپتەلىسى بىرنەشە شاقىرىمدى قۇرايدى.

قالادا تىركەۋى جوقتار كىرگىزىلمەيدى. پوليسيا قىزمەتكەرلەرى كەي تۇرعىنداردىڭ "قالاعا قالايدا كىرۋىم كەرەك" دەگەندەرىنە ەشتەڭە ىستەي المايتىنىن، ءتارتىپ سولاي ەكەنىن تۇسىندىرۋدە.

پوست بەكەت ماڭىندا شىمكەنت، تاراز قالالارىنا، قورداي ەلدىمەكەنىنە ادام جيناپ جۇرگەن تاكسيست كوپ. جول ءجۇرۋ باعاسى ءارتۇرلى. ماسەلەن، قوردايعا كىسى باسىنا 3 000 تەڭگە مەن 7 000 مىڭ تەڭگە ارالىعىندا سۇراپ تۇر.