ەستەرىڭىزدە بولسا، ءاز انالاردىڭ ەلورداسى استانانىڭ، ەلباسىمىز نۇرسۇلتان نازاربايەۆتىڭ تۋعان كۇنىنە ارناپ، 73 مەتر سىرماق تىككەنىن حابارلاعانبىز. ىلە-شالا، ق ر پرەزيدەنت اكىمشىلىگىنىڭ جەتەكشىسى ك.ءماسىموۆتىڭ، ق ر مادەنيەت جانە اقپارات ءمينيسترى م.قۇلمۇحاممەدتىڭ، استانا قالاسىنىڭ اكىمى ي.تاسماعامبەتوۆتىڭ، الماتى وبلىسىنىڭ اكىمى ا.مۇساحانوۆتىڭ، «نۇر وتان» پارتياسى ءتوراعاسىنىڭ ورىنباسارى ب.بايبەكتىڭ نازارىنا حات جازعانبىز(http://abai.kz/node/39957).
وسى اپتانىڭ باسىندا شەبەرلەر وتباسىنا باس سۇققان الماتى وبلىسى اكىمىنىڭ ورىنباسارى سەرىك مۇقانوۆ پەن تەكەلى قالاسىنىڭ جاڭا اكىمى تالعات مىرزالار ماڭدايى تەرشىپ وتىرىپ، مۇنداي باعالى دۇنيەگە تاڭدايلارىن قاققان ەكەن. ءتىپتى گيننەستىڭ رەكوردتار كىتابىنا جازىلاتىن وسىنداي ەڭبەكتى ەلورداعا الماتى وبلىسىنىڭ اتىنان جەتكىزۋ كەرەكتىگىن دە ەسكەرتكەن.
ەندى مىنە، 1 جىل بويى كوز مايلارىن تاۋىسقان انالار ەڭبەگى ەش كەتەيىن دەپ وتىر. وسىعان وراي الماتى وبلىسى اكىمىنىڭ ورىنباسارى سەرىك مۇقانوۆقا حابارلاسقانىمىزدا، «سىرماقتى ءوزىمىز ەلباسىنا تاپسىرامىز. ءبىراق شەبەرلەر بارمايدى» دەگەن بولاتىن. جاڭا عانا تەلەفون شالىپ ۇعىسساق، اكىم-قارالار ەلباسىعا ارنالعان سىيلىقتى تەكەلىنىڭ ءبىر بۇرىشىنا جاسىرا تۇرۋدى ءجون كورىپتى. مەملەكەت باسشىسى الماتى وبلىسىنا ءوزى كەلمەيىنشە، ءبىز اپارىپ بەرە المايمىز دەيتىن كورىنەدى.
قۇداي-اۋ، ءبىر جىل بويى كوز مايلارىن تاۋىسىپ، قالتالارىنان قاراجاتىن شىعارىپ، قازاق ەلىنىڭ باسشىسىنا ارناپ تىگىلگەن دۇنيەنى ەلورداسىنا جەتكىزۋگە قاۋقارى جەتپەسە، وبلىس اكىمى نە ىستەپ وتىر؟ ەگەر جەتكىزە الماسا، شەبەرلەرگە ءتيىستى اقىسىن تولەپ نەمەسە ەل سۇيىنەتىندەي سىي جاساسا ەشكىم قولىن قاقپايتىن شىعار؟
شىنداپ كەلگەندە، ەلباسىنىڭ كوزىنە ءتۇسىپ قالۋدا جۇرەك اينيتىن ءارتۇرلى قيتۇرقى دۇنيەلەرمەن ەمەس، وسىنداي ۇلتتىق قولونەرگە قولداۋ كورسەتۋدەن باستاسا كىم قوي دەپتى؟
ۇرپاققا ۇلگى، ەلباسىنا ماقتانىش، الماتى وبلىسىنا ابىروي اپەرەتىن وسىنداي يگى جۇمىس قانداي باعاعا دا لايىق ەمەس پە؟ ءتىپتى، الەمدىك باسپا ءسوز قازاقستان شەبەرلەرى مەملەكەت باسشىلارىنىڭ تۋعان كۇنىنە ايرىقشا سىي جاسادى دەپ اسپەتتەمەي مە؟
«ءبىز كەلەر جىلى 100 مەتر تىگەمىز» دەپ ەدى ءبىر سوزدەرىندە قوس شەبەر. ۇلىقتاردىڭ مىنانداي رۋحسىزدىعىنان سوڭ نە ايتامىز؟
Masa.kz
پىكىر قالدىرۋ