بۇل تۋرالى Qamshy.kz اقپارات اگەنتتىگى "بايتەرەك" ۇلتتىق باسقارۋشى حولدينگى" اق باسپا ءسوز قىزمەتى دەرەگىنە سۇيەنە وتىرىپ حابارلايدى.

بەلگىلى بولعانداي، "بايتەرەك" ۇبح" اق تۇرعىن ءۇي بلوگىنىڭ ەنشىلەس تۇرعىن ءۇي قۇرىلىس جيناق بانكى، قازاقستان يپوتەكالىق كومپانياسى، بايتەرەك ديەۆەلوپمەنت سىندى ۇيىمدارى قازاقستانداعى توتەنشە جاعدايدا ارەكەت ەتۋ مەرزىمىندە جەكە جانە زاڭدى تۇلعالاردىڭ قارىزدارى بويىنشا مەرزىمىن كەيىنگە قالدىرۋدى ۇسىنعان.

"اعىمداعى جىلعى 23 ناۋرىزدا توتەنشە جاعداي جونىندەگى مەملەكەتتىك كوميسسيانىڭ وتىرىسىندا ايتىلعان مەملەكەت باسشىسىنىڭ تاپسىرمالارىنا سايكەس، ۋاقىتشا قارجىلىق قيىندىقتارعا تاپ بولعان جەكە جانە زاڭدى تۇلعالار ءۇشىن حولدينگتىڭ تۇرعىن ءۇي بلوگىنىڭ ەنشىلەس ۇيىمدارى بارلىق تولەم بويىنشا، نەگىزگى قارىز بەن سىياقى سوماسىن قوسا العاندا، تۇرعىن ءۇي جانە تۇرعىن ەمەس جىلجىمايتىن مۇلىك وبەكتىلەرىن ساتىپ الۋ قۇقىعىمەن جالداۋ/ساتىپ الۋ-ساتۋ (ونىڭ ىشىندە ءبولىپ تولەۋ) بارلىق مامىلەلەرى بويىنشا، ايىپپۇلدار مەن ءوسىماقى ەسەپتەمەي، الداعى 3 ايعا (ءساۋىر-ماۋسىم) تولەمدەردى كەيىنگە قالدىرۋ تۋرالى شەشىم قابىلدادى"، - دەلىنگەن حابارلامادا.

ءبىر ەسكەرتە كەتەتىن جايت، اتالعان نەسيەلەردى كەيىنگە قالدىرۋدى مەملەكەتتىك وپەراتورلار قاشىقتىقتان بايلانىس ارنالارى ارقىلى جۇزەگە اسىرماق. ياعني، ءوتىنىش يەسىنىڭ جۇگىنۋى ارقىلى جەكە تارتىپپەن قارالاتىن بولادى.

قاشىقتان بايلانىس ارنالارى رەتىندە جەكە كابينەت، telegram-بوتتار، رەسمي سايتتار اتالۋدا. 

ال ءوتىنىش يەسى تۋىنداعان بارلىق سۇراق بويىنشا call-centr نومىرلەرى بويىنشا حابارلاسۋعا مۇمكىندىك جاسالىپ وتىر.

ول ءۇشىن: 

تۇرعىن ءۇي قۇرىلىس جيناق بانكى: 300

قازاقستاندىق يپوتەكالىق كومپانيا: +7 800 080 44 48

بايتەرەك ديەۆەلوپمەنت: +7 7172 79 65 60، +7 800 080 01 01 نومەرلەرىنە حابارلاسۋعا بولادى.