الماتى وبلىسىندا كوروناۆيرۋس دياگنوزىمەن تاعى 2 ادام تىركەلدى، دەپ حابارلايدى Qamshy.kz اقپارات اگەنتتىگى

بەلگىلى بولعانداي، ولار الماتى ىرگەسىندەگى قاراساي جانە ەڭبەكشىقازاق اۋداندارىندا انىقتالىپ، جالپى وبلىستا ۆيرۋس جۇقتىرعاندار سانى 6-عا جەتكەن.

قاتەرلى ىندەت جۇقتىرعان ناۋقاستىڭ بىرەۋى - قاراساي اۋدانى، كەمەرتوعان اۋىلىندا تۇراتىن 41 جاستاعى ايەل ادام. ناۋقاس ءقازىر قاراساي اۋداندىق ينفەكسيالىق اۋرۋحاناسىنا جاتقىزىلدى.

وعان قوسا ونىمەن قارىم-قاتىناستا بولعان 6 ادام، سونىڭ ىشىندە، ازاماتشانىڭ كۇيەۋى مەن 2020 جىلى تۋعان ءسابيى كارانتينگە الىندى.

ەكىنشى جاعداي بويىنشا، 1960 جىلى تۋعان ناۋقاس اعايىن-تۋىسىمەن وزبەكستانعا ۇيلەنۋ تويىنا شاعىن اۆتوبۋسپەن بارعان. 14 ادامنىڭ وزبەكستاننان قازاقستانعا ءوتىپ، ەسىك قالاسىنا كەلگەنى تۋرالى مالىمەتتەردى تۇركىستان وبلىسىنداعى سانيتارلىق-ەپيدەميولوگيالىق ماماندار حابارلاعان. 

تيىسىنشە، جولاۋشىلاعان توپ وبلىسقا كەلگەن بەتتە پروۆيزورلىق ستاسيونارعا جاتقىزىلعان. سونىڭ ىشىندە، 1960 جىلى تۋعان ايەلدەن ۆيرۋس انىقتالىپ، ءقازىر ول قاراساي اۋداندىق ينفەكسيالىق اۋرۋحاناسىنا جاتقىزىلىپ، ونىمەن قارىم-قاتىناستا بولعان وزگەلەرى دە كارانتيندە الىنعان.