ق ر پرەزيدەنتى ق.توقايەۆ تەلەارنالار ارقىلى جاساعان مالىمدەمەسىندە شاعىن جانە ورتا بيزنەسكە قولداۋ كورسەتۋ ءۇشىن بۇرىن-سوڭدى بولماعان شارالار قولعا الىنىپ وتىرعانىن ايتتى.

– كاسىپكەرلەرگە كومەك كورسەتۋىمىز كەرەك. ويتكەنى، ولار – ەكونوميكامىزدىڭ تىرەگى. اكىمدىكتەر جەرگىلىكتى كاسىپورىنداردىڭ ءونىمىن كەم دەگەندە 6 اي بويى كەپىلدى ساتىپ الۋ ءتارتىبىن جولعا قويۋى كەرەك. شاعىن جانە ورتا بيزنەس وكىلدەرىن بيىلعى 1 قازانعا دەيىن ەڭبەكاقى تولەۋ قورىنان ۇستالاتىن سالىقتان بوساتۋدى تاپسىرامىن، –  دەدى پرەزيدەنت.

مۇنداي قولداۋ ساۋدا، كولىك قىزمەتى، ءقوناقۇي، تۋريزم جانە باسقا دا سالالاردى قامتىماق.

اۋىل شارۋاشىلىعىمەن اينالىساتىن كاسىپكەرلەرگە دە قولداۋ كورسەتىلماك. اتاپ ايتقاندا، بيۋدجەتتەن 70 ميلليارد تەڭگە بولىنەدى. كوكتەمگى ەگىس ناۋقانى ءۇشىن «قاراپايىم زاتتار ەكونوميكاسى» باعدارلاماسى ارقىلى قوسىمشا 100 ميلليارد تەڭگە ءبولۋ تاپسىرىلدى.

– ۇكىمەتكە جانارماي نارىقتىق باعاسىن 15 پايىزعا ارزانداتىپ، 165 تەڭگەگە دەيىن تومەندەتۋ مىندەتى جۇكتەلدى. وسىنى قامتاماسىز ەتۋ ءۇشىن 390 مىڭ توننا جانارماي جەڭىلدىكپەن ساتىلاتىن بولادى، – دەدى توقايەۆ.