جالپى، قاسىرەت، جاماندىق اتاۋلى جالعىز-جارىم جۇرمەيتىنى، ەل مەن جۇرتتىڭ ەڭسەسى، رۋحى تۇسكەن كەزەڭدە توپەلەپ كەپ بىرىنەن كەيىن ءبىرى شۇيدەدەن سوعاتىنى بەلگىلى. شىداس بەرۋ وتە قيىن. حالقىمىزدىڭ وسۋ-وركەندەۋ شەجىرەسىن پاراقتاساق، قازاق ەل بولىپ ەتەك جيناعالى نەقيلى زوبالاڭداردى باستان وتكەرىپ، بارلىعىنان دا بەرەكەسى مەن بىرلىگىنىڭ ارقاسىندا امان-ەسەن وتكەن ەكەن.
وسى جولعى كورونوۆيرۋس ناۋبەتى – تەك قانا قازاق ەمەس، الەم جۇرتىنا سىناق بولاتىن سياقتى. بۇل ادامزاتقا قىرعىن سەبەتىن زاۋال قايدان كەلدى، جەر بەتىن قاشانعا دەيىن ۇرەي مەن قورقىنىش ۋىسىندا ۇستايدى، اياقتالار مەرزىمى ايقىن با، انتيۆيرۋس تابىلا ما دەگەندەي ءۇمىت-سۇراقتار ءالى كۇنگى اشىق تۇر. جالپى، قازاقتا: «جامان ايتپاي – جاقسى جوق» دەگەندەي ىمىراعا، جاعىمپازدىققا كونبەيتىن ماتەل بار. كوگەنتۇپ مازمۇنى، شىندىقتى بۇركەمەلەمەي اشىق ايت دەگەنگە سايادى. اشىعىن ايتايىنشى.
اقىرزامان جايلى ايتۋ ەرتە. دەسەك تە، ادامزاتتىڭ اسىرە ازعىنداپ، اسىرە ەسىرىپ، اسىرە ەسىرىكتەنىپ بارا جاتقانى راس بولاتىن. قازاقتا: «جالشىعا جىميىپ قاراساڭ، شاپانىنا جاماۋ سۇرايدى» دەگەندەي تۇراقتى ءسوز تىركەسى بار. ءبىز اللانىڭ كەڭپەيىلدىلىگىن كوتەرە المادىق. ادامي مورال شەكاراسىن بۇزىپ-جارىپ، توپالاڭ جاساپ جاتقانىمىزدى بىردە جاڭا زامان مادەنيەتىنىڭ شارىقتاپ وسۋىنە، ەندى بىردە وركەنيەتكە جاتقىزىپ، سولاردى جەر بەتىن جايلاعان پەندەلەردىڭ بارلىعىنا ۇلگى-ەتالون رەتىندە ۇسىنا باستاعانىمىز وتىرىك پە؟! تاۋبەمىزگە تۇسپەدىك، جاساعاننىڭ قولىنان الىپ وتىرعان تاڭعى اسىمىزعا شۇكىرىمىزدى ايتۋدى ۇمىتتىق، نيەتىمىز بەن پەيىلىمىز تارىلدى، مونداناقتاي جەر بەتىن جەمقورلىق پەن بوق-دۇنيەگە دەگەن اشقاراقتىق جايلادى، مەيىرىم مەن يماندىلىقتى ىسىرىپ تاستاپ قورقاۋلىقتى، قاراقشىلىقتى الدىڭعى قاتارعا شىعاردىق. ۇرپاعىمىزعا ۇلگى ەتتىك.
مىنە، ادام بالاسىنىڭ ءداپ وسىنداي ازعىنداۋىن اللا كورمەي، بىلمەي وتىر دەيسىز بە؟ جوق. كورىپ وتىر. كوز جاسىن كولدەتىپ وتىر. اقىرى، قاتال شەشىمگە كەلدى ول. مىنا زاۋال – جاساعان يەمىزدىڭ ادامزاتتى ءبىر ساتكە بولسىن تاۋبەسىنە تۇسىرەيىن دەگەندەي وقىس ارەكەتى. اللانىڭ ەسكەرتۋى: «جوعالتقان جاقسىلىقتارىڭدى قايتارا تاۋىپ ال، كوزىڭدى اش! ەي، پەندە، ادام ەكەنىڭدى ۇمىتپا!»
ماسەلە، بۇل ىندەتتىڭ قايدان، كىمنەن شىققانىندا ەمەس. ماسەلە: بىرلىك پەن بەرەكەدە! مادەنيەت پەن وركەنيەت ەسىرىك بي مەن ءتان جالاڭاشتاۋدا، داراقى ءان مەن بەيادەپ تىرلىكتە دەۋ وتە جاڭساق ۇعىم. كەمەڭگەرىمىز ابايدىڭ مۇقىم شىعارمالارىنىڭ ءتۇيىنى نەگە ادام بول دەگەن تۇسىنىككە توقايلاسادى دەيسىز. ادام بولۋ – كىسىلىك پەن ادامگەرشىلىك، ۇيات پەن ار شەڭبەرىن بۇزباۋ! بۇزدىڭ ەكەنسىڭ – سەنىڭ ادامدىعىڭنىڭ قۇنى بەس تيىن!
قازىرگى كۇنگى كورونوۆيرۋس زاۋالىن تەك ادامي سالقىنقاندىلىق، مەملەكەتتىك بىرلىك، ۇلتتىق بەرەكە، الەمدىك اۋىزبىرشىلىك ارقىلى عانا جەڭەمىز.
الىبەك قاڭتاربايەۆ،
قازاقستان جازۋشىلار وداعى شىعىس قازاقستان وبلىستىق فيليالىنىڭ
ديرەكتورى
