جۋرناليست ۆاديم بورەيكو facebook پاراقشاسىندا ەلباسىنىڭ باسپا ءسوز حاتشىسى ايدوس ۇكىبايدىڭ نۇرسۇلتان نازاربايەۆتىڭ دەنساۋلىعى تۋرالى اڭگىمەگە تۇسىنىك بەرگەن جازباسى جايلى پىكىر ءبىلدىردى.

جۋرناليست پرەزيدەنت توقايەۆ پەن ەكس-پرەزيدەنت نازاربايەۆتىڭ ەل الدىنا شىقپاي كەتكەنىن بۇرىنىراقتا جازعانىن اتاپ وتكەن. 31 ناۋرىزدا توقايەۆ تەلەديدار ارقىلى ۇندەۋ جاساعان سوڭ وعان قاتىستى ماسەلە كۇن تارتىبىنەن تۇسكەنىن ايتىپ، ەلباسىنىڭ 10 ناۋرىزدان بەرى جۇرتشىلىق الدىنا شىقپاعانىنا، elbasy.kz سايتىنىڭ جاڭارماي تۇرعانىنا نازار اۋداردى.

بورەيكو 3 ساۋىردە elbasy.kz سايتى جاريالاعان نازاربايەۆتىڭ اكىمدەرمەن ازاماتتار قاۋىپسىزدىگىن تالقىلاعانى جونىندەگى اقپاراتتىق حابارلامادا قولدانىلعان ەلباسى تەلەفوندى قۇلاعىنا تاقاپ تۇرعان سۋرەتتىڭ ەسكى ەكەنىن انىقتاعان. سۋرەت 2019 جىلعى 25 قازاندا جاريالانعان سۋرەت فراگمەنتى ەكەنى بەلگىلى بولدى.

جۋرناليست ايدوس ۇكىبايدىڭ ەلباسى دەنساۋلىعى تۋرالى تاراتقان اقپاراتتا "جالعان"، "ارانداتۋ" سوزدەرىنىڭ قولدانىلۋى باسپا ءسوز حاتشىدان گورى، ساياسي دەباتتا ايتىلاتىن سوزدەرگە كوبىرەك ۇقسايدى دەپ سانايدى.

ايدوس ۇكىبايدىڭ كارانتينگە بايلانىستى شەكتەۋ الىنعاننان كەيىن ەلباسىنىڭ جۇمىس بارىسىنان بەينەجازبا ازىرلەۋگە ۋادە بەرۋىن ۆاديم بورەيكو باسپا ءسوز حاتشى نۇرسۇلتان نازاربايەۆتىڭ جانىندا ەمەس ەكەنىن ايعاقتادى دەگەن پىكىردە.

ءجۋرناليستىڭ ويىنشا، ايدوس ۇكىبايدىڭ جازباسىندا بايسالدى ءۋاج كەلتىرىلمەگەن. تەك ەموسياعا ەرىك بەرىلىپ، اياۋشىلىق سەزىمىن تۋدىرۋعا تىرىسۋشىلىق بار. «اعايىن، مەنىڭ سوزىمە سەنىڭىزدەر» دەگەندى جەتكىزگىسى كەلەتىندەي.