ق ر تۇڭعىش پرەزيدەنتى، ەلباسى نۇرسۇلتان ءابىش ۇلى نازاربايەۆ اقتوبە وبلىسىنىڭ اكىمى وڭداسىن ورازالينمەن تەلەفون ارقىلى بايلانىسقا شىعىپ، ەلدىڭ حال جاعدايىن سۇرادى.
اقتوبە وڭىرىندەگى جالپى جاعدايدىڭ تۇراقتىلىعىمەن، ىندەتكە قارسى جاسالىپ جاتقان جۇمىستاردىڭ جوسپارىمەن تانىسىپ، وبلىس تاراپىنان قابىلدانعان شارالاردىڭ دۇرىستىعىن ماقۇلدادى. سونىڭ ىشىندە رەسپۋبليكالىق بيۋدجەتتەن بولىنەتىن كومەكتەن تىس، وبلىستىق بيۋدجەتتەن جاردەماقىلاردىڭ ءبولىنۋىن دۇرىس ارەكەت دەپ باعالادى. سونداي اق كوممۋنالدىق تولەمدەردىڭ جەڭىلدەتىلگەنىن، ۋاقتىلى جاسالعان الدىن الۋ شاراسى رەتىندە قولدادى. كوكتەمگى ەگىس ناۋقانىنا دايىندىق جۇمىستارى بارىسىمەن تانىسىپ، ۋاقىتقا ساي جەر ىلعالىن ءتيىمدى پايدالانىپ،اۋىلشارۋاشىلىق تەحنولوگيالاردى ساقتاي وتىرىپ، ەگىستىككە مۇقيات نازار اۋدارۋدى تاپسىردى.
وڭىردەگى مال شارۋاشىلىعىنىڭ دا جاي-كۇيىنەن حاباردار بولدى. سونىمەن بىرگە توتەنشە جاعدايعا بايلانىستى ەلباسى قورىنان نۇر وتان پارتياسى ارقىلى جەتكىزىلەتىن كومەكتىڭ ءبولىنۋىنىڭ رەتتەرىمەن اقىلداستى. ياعني ەلگە جاردەم رەتىندەگى ازىق-تۇلىكپەن، باسقا دا قاجەتتى زاتتارمەن، دارى-دارمەكپەن تاراتىپ جەتكىزىلۋى جونىندە پىكىرىن سۇرادى.
وبلىس اكىمى وڭداسىن ءورازاليننىڭ قايىرىمدىلىق رەتىندە بەرىلەتىن زاتتاردى ەرىكتىلەر ارقىلى جەتكىزۋ ولاردىڭ دەنساۋلىعىنا ءقاۋىپ ءتوندىرۋ ىقتيمالدىعى سەبەپتى الاڭداۋشىلىق بىلدىرگەن سوڭ، اركىمنىڭ جەكە ەسەبىنە اقشالاي اۋدارعان ىڭعايلى بولار دەگەن ۇسىنىستى ماقۇلدادى. ەلباسى وڭداسىن ءورازاليننىڭ ءوزىنىڭ جانىندا ءبىراز جىلدار بىرگە ءجۇرىپ قىزمەت بارىسىندا جيناعان تاجىريبەسىنە كوڭىلى تولاتىندىعىن ايتا كەلە، توتەنشە جاعداي ۋاقىتىنداعى وبلىس كولەمىندەگى اتقارىلىپ جاتقان بارلىق جۇمىستارعا وڭ باعا بەرىپ، وعان سەنەتىنىن جەتكىزدى.
تۇبىندە بۇل ىندەتتى حالىقتىڭ اۋىزبىرشىلىگىمەن جەڭىپ شىعاتىنىنا ەشقانداي كۇمان كەلتىرمەي، قۇتتى مەكەن – اقتوبەگە كەلىپ، ەل تۇرعىندارىمەن جۇزدەسۋ جوسپارىمەن ءبولىستى.
پىكىر قالدىرۋ