تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا الماتىدا COVID-19 تەستىنەن وتۋگە بولاتىن ورىندار اشىلاتىنىن مالىمدەدى.

– كوروناۆيرۋستىق ينفەكسيانىڭ كەڭىنەن تارالىپ كەتپەۋى ءۇشىن بۇكىل الەمدە قولدانىلاتىن ەكى ءتيىمدى ءادىس بار. ءبىرىنشىسى – ءاربىر ازامات ءوز-وزىن وقشاۋلاۋ كەرەك، ەكىنشىسى – تەستىلەۋدەن ءوتۋ. ۇكىمەت CوVID-19 ۆيرۋسىن انىقتايتىن تەستى ساتىپ الۋعا قارجى ءبولدى، – دەدى ا. مولداعاسىموۆا.

 

دەنساۋلىق ساقتاۋ مينيسترلىگى ەنگىزگەن ەرەجەگە سايكەس، COVID-19 تەستىلەۋىنەن وتۋگە كۆي جۇقتىرعان بولۋى مۇمكىن دەگەن ادامدار؛ ناۋقاستانعاندارمەن بايلانىستا بولعاندار؛ قاتەرلى ىندەت كەڭ تارالعان مەملەكەتتەردەن كەلگەن ادامدار جانە مەديسينا قىزمەتكەرلەرى سانالادى.

– تەستىلەۋدىڭ كەلەسى ءتۇرى – جەدەل-تەستتەر، ولار قازىرگى تاڭدا قالاعا ءتۇستى. ءقازىر «وليمپ» مەديسينالىق زەرتحاناسى سانيتارلىق ەرەجەلەرگە سايكەس 5 پۋنكت دايىندادى. قايىرىمدىلىق قورلارىنىڭ ءبىرى دەنساۋلىق ساقتاۋ باسقارماسىنا قوسىمشا جەدەل-تەست ساتىپ اپەردى. بۇگىنگى تاڭدا باسقارمادا 8 پۋنكت ناقتىلاندى، ولار جاقىن ارادا جۇمىسقا كىرىسەدى، – دەدى دەپارتامەنت باسشىسى ايزات مولداعاسىموۆا.

سونىمەن قاتار ول جەدەل-تەستىلەۋ جۇمىسى اقپاراتتىق قىزمەتپەن رەتتەلىپ وتىراتىنىن جانە جەدەل جاردەم قىزمەتكەرلەرى، ستاسيوناردا جاتپاعان ءبىراق جرۆي-مەن اۋىرعاندار، سوزىلمالى اۋرۋلارى بار جاندار، قۇقىق قورعاۋ ورگاندارىنىڭ، ۇلتتىق گۆارديا وكىلدەرى، ەرىكتىلەر، اكىمدىك جانە كوممۋنالدىق قىزمەتتەردىڭ وكىلدەرى دە جەدەل-تەستتەن وتۋىنە بولاتىنىن اتاپ ءوتتى.

جەدەل-تەستىلەۋدەن قالاي وتۋگە بولادى؟

– بۇل جەدەل-تەستىلەۋدەن ءوتىنىم بەرگەن جانە ناقتى كورسەتىلگەن سىلتەمەلەردە ساۋالناما مالىمەتتەرىن تولتىرعان تۇلعالار وتە الادى. ءسىز ساۋالنامالىق دەرەكتەردە كورسەتكەن سيمپتومدارىڭىز بويىنشا تەست تاپسىرۋ ءۇشىن ىرىكتەۋدەن وتەسىز. ءوتىنىشىڭىز ماقۇلدانعاننان كەيىن سىزگە سمس-حابارلاما كەلەدى، وندا جەدەل-تەست وتەتىن جەردىڭ مەكەن-جايى مەن ۋاقىتى كورسەتىلەدى، – دەپ ءسوزىن قورىتىندىلادى.

ايتا كەتەتىن ءجايت، بريفينگ كەزىندە جەدەل-تەستىلەۋدەن ءوتۋ قالا بويىنشا تەگىن ەكەندىگى ايتىلدى.