الماتى قالاسى اكىمدىگىنىڭ باسپا ءسوز ورتالىعىندا وتكەن بريفينگتە الماتى قالاسى الەۋمەتتىك ءال-اۋقات باسقارماسىنىڭ باسشىسى راحات شيماشيەۆا توتەنشە جاعداي كەزىندەگى الەۋمەتتىك قولداۋ شارالارى تۋرالى ايتىپ بەردى.

– الماتى قالاسى اۋماعىندا توتەنشە جاعدايدىڭ ەنگىزىلۋىنە بايلانىستى قالا حالقىنىڭ وسال توپتارىنا جان-جاقتى الەۋمەتتىك كومەك كورسەتۋ جۇمىستارى جالعاسۋدا. ارنايى قاراجات رەسپۋبليكالىق جانە جەرگىلىكتى بيۋدجەتتەن، سونىمەن قوسا "Birgemiz" جانە "جاڭا الاتاۋ" قوعامدىق قورلارىنىڭ ەسەبىنەن بولىنۋدە. بۇلارعا قوسا اۋدان اكىمدىكتەرىندە ءىرى كاسىپكەرلەر دە قولداۋ كورسەتۋدە. ءبىر ايدان بەرى ءبىزدىڭ باسقارمادا ارنايى call-ورتالىق جۇمىس ىستەۋدە. كارانتين باستالعالى وعان 11 مىڭنان اسا قوڭىراۋ تۇسكەن، – دەدى باسقارما باسشىسى.

وسى ۋاقىت ىشىندە الەۋمەتتىك ءال-اۋقات باسقارماسىنىڭ بايلانىس ورتالىعىنا 5825 سۇراق كەلىپ تۇسكەن. ولاردىڭ باسىم كوپشىلىگى، ياعني 50-60 پايىزى – ازىق-تۇلىك سەبەتىنە قاتىستى بولسا، قالعان 30 پايىزى 42 500 تگ قالاي الامىن دەگەن ماسەلەگە تيەسىلى.

سونىمەن قاتار، Open Almaty ورتالىعىنا – 5193 ساۋال تۇسسە، Nur Otan پارتياسى 196 سۇراق قابىلداعان.

«جاڭا الاتاۋ» قورى مەن Nur Otan پارتياسىنىڭ دەمەۋشىلىك قاراجاتى ەسەبىنەن مۇقتاج ادامدارعا ازىق-تۇلىك سەبەتتەرى مەن سانيتارلىق-گيگيەنالىق قورجىن تۇرىندە دە الەۋمەتتىك كومەك كورسەتىلۋدە.

بۇگىنگى كۇنى 5،5 مىڭعا جۋىق ادام وسىنداي سەبەتتەر مەن جيىنتىقتاردى الىپ ۇلگەرگەن. ولاردىڭ قاتارىندا ۇيىنە بارىپ قىزمەت كورسەتۋگە مۇقتاج جالعىزباستى زەينەتكەرلەر، 2019 جىلدىڭ اياعىنان ااك الۋشى، ءبىراق 2020 جىلدىڭ جاڭا تالاپتارىنا سايكەس كەلمەيتىن ازاماتتار، سونىمەن قاتار، سەنىم تەلەفونىنا حابارلاسقان باسقا دا مۇقتاج جاندار بار.

بۇل كومەك ناقتى مۇقتاج ادامدارعا مەملەكەت باسشىسىنىڭ تاپسىرمالارىن ورىنداۋ بويىنشا قالالىق ءىس-شارالار جوسپارىنىڭ 23-تارماعىنا سايكەس كورسەتىلەدى.

ەلباسىنىڭ باستاماسىمەن قۇرىلعان «Birgemiz» قوعامدىق قورى حالىقتىڭ الەۋمەتتىك وسال توبىنا جاتاتىن 23 مىڭنان استام ادامعا الەۋمەتتىك تولەمدەردى جۇزەگە اسىرۋ ءۇشىن قاراجات ءبولۋدى جوسپارلاپ وتىر.

وسىلايشا، 1-توپتاعى مۇگەدەكتەر، مۇگەدەك بالانى كۇتۋمەن اينالىساتىن اتا-انالار سياقتى كومەككە ءزارۋ جاندار «Birgemiz» قورىنان جانە 2 اەك مولشەرىندەگى تولەمدەر سەكىلدى الەۋمەتتىك كومەكتىڭ بىرنەشە ءتۇرىن الادى.

توتەنشە جاعداي كەزىندە جەكەلەگەن ساناتتاعى ادامداردى الەۋمەتتىك قامسىزداندىرۋ ءتارتىبى بەكىتىلگەن بولاتىن. بۇگىنگى كۇنى ولارعا كەمىندە 2 اەك تۇرىندە (5302 تەڭگە) الەۋمەتتىك كومەك كورسەتىلدى.

رەسپۋبليكالىق بيۋدجەت قاراجاتىنان 43،8 مىڭ ادامعا 244،1 ملن تەڭگە تولەنگەن. ەڭبەك ءمينيسترىنىڭ بۇيرىعىنا وزگەرتۋلەر ەنگىزىلۋىنە بايلانىستى رەسمي تۇردە جۇمىسسىز رەتىندە تىركەلگەن 3-توپتاعى مۇگەدەكتەرگە قوسىمشا 140 ملن تەڭگە 2 اەك مولشەرىندە تولەم تولەۋ جوسپارلانۋدا.

توتەنشە جاعدايدىڭ ەنگىزىلۋىمەن كىرىسىن جوعالتقاندارعا الەۋمەتتىك تولەم تولەۋ تۋرالى مەملەكەت باسشىسىنىڭ تاپسىرماسى اياسىندا قۇجاتتار قابىلداۋ، سونداي-اق ءتۇسىندىرۋ جۇمىستارى جۇرگىزىلۋدە.

تابىسىنان ايىرىلعان 6 مىڭنان استام قالا تۇرعىنى مەملەكەتتىك الەۋمەتتىك ساقتاندىرۋ قورىنان 1 ەتج مولشەرىندە (42،5 مىڭ تگ) الەۋمەتتىك كومەك الدى. جالپى، وسى جاردەماقىنى الۋ ءۇشىن بۇگىنگى كۇنى 67 مىڭنان استام ءوتىنىش كەلىپ تۇسكەن، قامتىلعان ادامداردىڭ سانى – 83 مىڭ.