جامبىل وبلىسى مەركى اۋداندىق ورتالىق اۋرۋحاناسىنىڭ تولقىناي وردابايەۆا اتتى ينفەكسيونيست دارىگەرى قىزمەت بارىسىندا  كوروناۆيرۋس جۇقتىرعانىن، مەديسينالىق مەكەمە اكىمشىلىگى دارىگەرلەرگە قىسىم كورسەتكەنىن الەۋمەتتىك جەلىدەگى پاراقشاسىندا جازعان. دارىگەر بۇگىن تاعى دا جازبا قالدىرىپ، اۋداندىق اۋرۋحانا باس دارىگەرىنىڭ ورىنباسارى ج.ب. شويبەكوۆامەن بولعان ەكەۋارا اڭگىمەنىڭ سكرينشوتىن جاريالادى.

Whatsapp جەلىسىندەگى اڭگىمە تومەندەگىدەي وربىگەن.

شويبەكوۆا: – سەن ماماندىعىڭنان قاشىپ ءجۇرسىڭ عوي.

وردابايەۆا: – مەن اۋىرىپ ءجۇرمىن. اۋىرماعان ادامدار دا دەمالىسقا شىعىپ جاتىر.

شويبەكوۆا: – نەگىزى باسقا اۋدانداردا تار شەڭبەرلى مامانداردى اقىسىز دەمالىسقا جىبەردى.

وردابايەۆا: – مەن ناۋرىز ايى بويى ۇياتىم ءۇشىن جۇمىس ىستەدىم. ءسىز ار-ۇياتى بار ادام بولساڭىز، مەنى تۇسىنەسىز دەپ ويلايمىن. بارلىق دارىگەرلەر ينفەكسيا ءبولىمىن اينالىپ ءوتىپ ءجۇردى. جولاماۋعا تىرىساتىن. مەن پوليكلينيكاداعى جۇمىسىمدى تىنىش قانا ىستەگىم كەلەدى. شورايەۆانى دەمالىستان شاقىرىڭىزشى.

شويبەكوۆا: – سەن 60 جاستاعى كەمپىر ەمەسسىڭ. جىلاي بەرمە.

وردابايەۆا: – مۇنداي جۇكتەمە ءۇشىن ماعان ناۋرىزدا سىياقى دا بەرىلمەدى.

شويبەكوۆا: – شورايەۆا جۇمىسقا ۋاقىتى كەلگەندە شىعادى. مەن تۋرالى ايتۋىڭدى قويماساڭ، جالا جاپتى دەپ جاۋاپقا تارتقىزامىن. مەن سەنىڭ اناڭنان ۇلكەن اداممىن.

وردابايەۆا: – مەنىڭ انام سىزدەن ۇلكەن.

شويبەكوۆا: – سەن ءوزى دارىگەر ەمەس، ساۋداگەر دارىگەر ەكەنسىڭ.

وردابايەۆا: – قالتاڭدا اقشا كوپ بولعاندا بۇلاي دەپ ايتۋ وڭاي. ال مەن كەدەي، جاس مامانمىن. مەن ءومىرىمدى قاتەرگە تىگەمىن.

ەسكە سالا كەتسەك، بۇعان دەيىن جامبىل وبلىسىندا ەمحانا باسشىلىعى دارىگەرلەردىڭ كوروناۆيرۋس جۇقتىرعانىن جاسىرىپ وتىرعانى حابارلانعان بولاتىن.