قازاقستاننىڭ دارىگەرلەرىنە كومەك كورسەتۋ ءۇشىن قىتايدان مەديسينا قىزمەتكەرلەرى كەلدى. بۇل تۋرالى ق ر سىرتقى ىستەر مينيسترلىگىنىڭ باسپا ءسوز قىزمەتى حابارلادى.

– بۇگىن قىتايلىق ارىپتەستەرىمىزدى قارسى الدىق. بۇل كەزدەسۋ ەكى ەل باسشىلارىنىڭ ۋاعدالاستىعى اياسىندا وتۋدە. ءبىز ءۇشىن بۇل كەزدەسۋ ءسوزسىز ماڭىزدى، سەبەبى قىتايدىڭ ەپيدەميولوگيا ماسەلەلەرىندەگى ەمدەۋ تاجىريبەسى مەن زەرتتەۋلەرى ماڭىزدى بولىپ وتىر. قىتايدان 10 دارىگەر ارنايى كەلدى، ولاردىڭ اراسىندا پۋلمونولوگ، ەپيدەميولوگ ماماندار، قوعامدىق دەنساۋلىق ساقتاۋ ساراپشىلارى بار. 15 كۇندىك ءىسساپاردا ولار كوروناۆيرۋس ينفەكسياسىن جۇقتىرعانداردى دياگنوستيكالاۋ، ەمدەۋ جانە قوعامدىق دەنساۋلىق ساقتاۋ ماسەلەلەرىن تالقىلايدى، – دەدى دەنساۋلىق ساقتاۋ ۆيسە-مينيسترى كامالجان نادىروۆ.

قىتايلىق دارىگەرلەر نۇر-سۇلتان، قاراعاندى، الماتى قالالارىنا وزدەرىنىڭ تاجىريبەلەرىمەن ءبولىسىپ، كومەك كورسەتەتىن بولادى.

– بىزدە بۇل سىرقاتتان جازىلىپ، اۋرۋحانادان شىققان ناۋقاستار بار. سونىمەن قاتار، اۋىر حالدە جاتقان ازاماتتارىمىز دا بار. ءبىرقاتارى وكپەنى جاساندى جەلدەتۋ اپپاراتتارىندا جاتىر. سوندىقتان، ارىپتەستەرىمىزبەن تالقىلايتىن ماسەلە كوپ. بىزدە بۇل اۋرۋدى دياگنوستيكالاۋ مەن ەمدەۋدىڭ كلينيكالىق حاتتاماسى بەكىتىلگەن. بۇل حاتتاما ۇزدىك حالىقارالىق تاجىريبەلەرگە ساي كەلەدى. ارىپتەستەرىمىزدىڭ دە تاجىريبەسىن زەرتتەپ، وزىمىزگە پايدالى دەرەك الاتىنىمىزعا سەنىمدىمىن، – دەدى ك. نادىروۆ. 

جۇڭگو ەلشىسى چجان سياو ءوز سوزىندە دارىگەرلەردىڭ تاجىريبەلى، جوعارى بىلىكتى مامان ەكەنىن اتاپ ءوتتى. 

– قازاقستاندا پاندەمياعا قاتىستى كۇردەلى جاعداي ورىن الدى. وكىنىشكە قاراي، ۆيرۋس جۇقتىرعانداردىڭ سانى ارتىپ كەلەدى. قىتايدىڭ شىڭجان-ۇيعىر اۆتونومدى اۋدانىنان كەلگەن دارىگەرلەر دە وسى ىندەتپەن كۇرەسىپ، كوپتەگەن ناۋقاستاردى ەمدەپ جازعان. بۇل اۋرۋدىڭ سوققىسى العاش رەت قىتايعا ءتيدى. بۇگىنگە دەيىن ۆيرۋسپەن كۇرەسۋ بويىنشا ءبىرقاتار تاجىريبە جيناقتادىق. ءالى كۇنگە دەيىن بۇل ۆيرۋس - ءبىز ءۇشىن جاڭا، ول تۋرالى بىلەرىمىز از. ءبىراق، قازاقستاندىق دوستارعا دا ايتارىمىز بار. كوروناۆيرۋسپەن كۇرەس بويىنشا تاجىريبە بولىسۋگە دايىنبىز، – دەدى چجان سياو.

شىڭجاندىق دارىگەر لۋ چجەن دارىگەرللەردىڭ قازاقستانعا ۇلكەن دايىندىقپەن كەلگەندىگىن جانە ينفەكسيامەن قالاي كۇرەسكەندەرىن تاجىريبە جۇزىندە كورسەتەتىندەرىن اتاپ ايتتى.