سەيسەنبىدە بىرنەشە حالىقارالىق ب ا ق اۆستريادا مىڭداعان دۇكەن قايتا اشىلا باستايتىنىن جازدى. وسىلايشا اۆستاريا كوروناۆيرۋس شەكتەۋىن الىپ تاستاعان ەۋروپاداعى العاشقى ەل بولدى.

اۆستريا بيلىگى ەلدە كوروناۆيرۋس العاش رەت تارالا باستاعاندا مەكتەپتەردى، كافەلەر مەن بارلاردى، تەاترلار، مەيرامحانالاردى، دۇكەندەر جانە باسقا دا ادام كوپ جينالاتىن ورىنداردى جابۋدى باستاعان. حالىقتى ۇيدە وتىرىپ جۇمىس ىستەۋگە شاقىرعان. 

ءقازىر اۆستريادا جالپى 368 ادام كوروناۆيرۋستان كوز جۇمعان. بۇل كورسەتكىش ەۋروپاداعى كەيبىر ەلدەردىڭ كۇن سايىنعى ولىمىنەن از.

ال ازياداعى ەڭ ۇلكەن ءارى حالقىنىڭ سانى ەڭ كوپ ەلدەردىڭ ءبىرى ءۇندىستان كوروناۆيرۋسقا بايلانىستى قويىلعان شەكتەۋلەر 3 مامىرعا دەيىن ۇزارتىلاتىنىن جاريالادى.

ءۇندىستان پرەمەر-مينيسترى نارەندرا مودي حالىقتى "ءتارتىپتى" ساقتاۋعا شاقىردى. ول سەيسەنبى كۇنى حالىققا ۇندەۋ جولداپ، العاشقى ءۇش اپتالىق شەتەۋ ەل ەكونوميكاسىنا اۋىر سوققى بولدى دەپ مويىندادى.

"ەكونوميكالىق تۇرعىدان العاندا ءبىز ۇلكەن شىعىنعا باتتىق. ءبىراق ءۇندىستان حالقىنىڭ ءومىرى الدەقايدا قىمبات" دەدى نارەندرا مودي.

سوڭعى دەرەك بويىنشا، ءۇندىستاندا 9000-نان استام ۆيرۋس جۇقتىرعان.  ولاردىڭ 339-ى كوز جۇمعان.

ءۇندىستاندا قاتال شەكتەۋ شارالارى ەنگىزىلگەن. ازاماتتارعا قاجەتتى زاتتاردى ساتىپ الۋ ءۇشىن عانا ۇيلەرىنەن شىعۋعا رۇقسات ەتىلگەن، ءتىپتى، بىرنەشە ءىرى پروۆينسيا مەن قالادا زاڭ بويىنشا ادامدارعا ماسكا تاعۋ تالاپ ەتىلەدى.