ق ر پرەمەر-مينيسترى اسقار ءماميننىڭ توراعالىعىمەن توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ كەزەكتى وتىرىسىندا 20 ساۋىردەن باستاپ نۇر-سۇلتان مەن الماتىدا جۇمىسىن قايتا باستايتىن قىزمەت تۇرلەرىنىڭ ءتىزىمى بەكىتىلدى، دەپ جازادى primeminister.kz.

مەملەكەتتىك كوميسسيا بيىلعى 20 ساۋىردەن باستاپ قاتاڭ سانيتارلىق-ەپيدەميولوگيالىق شارالاردى ساقتاي وتىرىپ، نۇر-سۇلتان جانە الماتى قالالارىندا جۇمىسىن قايتا باستايتىن كاسىپكەرلىك سۋبەكتىلەرىنىڭ قىزمەت تۇرلەرىنىڭ ءتىزىمىن بەكىتتى.

نۇر-سۇلتان قالاسىندا:

• ونەركاسىپتىك كاسىپورىندار؛

• قۇرىلىس جانە جول-قۇرىلىس سالالارىنىڭ كومپانيالارى، ءىرى قۇرىلىس دۇكەندەرى؛

• كولىك، قويمالاۋ سالالارىنداعى كومپانيالار، اۋىل شارۋاشىلىعى ماقساتىنداعى سەرۆيستىك كومپانيالار؛

• اۆتوسالوندار، تقس، اۆتو جۋۋ، دوڭگەلەك اۋىستىرۋ سەرۆيسى، اۆتوبولشەكتەر دۇكەندەرى، حيميالىق تازالاۋ، كەڭسە تەحنيكاسىن جوندەۋ؛

• ەكىنشى دەڭگەيلى بانكتەر ساعات 9:00-دەن 16:00-گە دەيىن شتات سانىنىڭ 50%-ىن شەكتەۋمەن، نوتارۋيستەر الدىن الا جازىلۋ بويىنشا جۇمىس ىستەيدى؛

• قوعامدىق تاماقتانۋ نىساندارىنىڭ جۇمىسى تەك وزىمەن الىپ كەتۋ جانە جەتكىزۋ قىزمەتىمەن ساعات 22:00-گە دەيىن ۇزارتىلادى.

الماتى قالاسىندا:

• ونەركاسىپتىك كاسىپورىندار؛

• قۇرىلىس جانە جول-قۇرىلىس سالالارىنىڭ كومپانيالارى، قۇرىلىس ماتەريالدارىنىڭ ءىرى كوتەرمە بازارلارى؛

• نوتاريۋستەر الدىن الا جازىلۋ بويىنشا؛

• تەك بيزنەسكە قىزمەت كورسەتۋ ءۇشىن حقكو ءبىر بولىمشەسى (ناۋرىزباي اۋدانى، شۇعىلا شاعىن اۋدانى، 347/1). 

نۇر-سۇلتان جانە الماتى قالالارىنداعى شۇعىل شتابتار كاسىپورىندار مەن كاسىپكەرلىك سۋبەكتىلەرىنىڭ ناقتى ءتىزىمىن، ولاردىڭ قىزمەتكەرلەرىنىڭ ناقتى سانىن، جۇمىس ۋاقىتىن جانە جەتكىزىلۋ ءتاسىلىن انىقتايدى. 

ۇكىمەت باسشىسى نۇر-سۇلتان جانە الماتى قالالارىنىڭ اكىمدەرىنە ءتيىستى شارالاردى قابىلداپ، جۇمىسى قايتا جانداناتىن نىسانداردا سانيتارلىق-ەپيدەميولوگيالىق قاۋىپسىزدىكتىڭ ساقتالۋىنا قاتاڭ باقىلاۋ جاساۋدى قامتاماسىز ەتۋدى تاپسىردى.