مۇقتاج وتباسىلار نۇرسۇلتان نازاربايەۆتىڭ باستاماسىمەن قۇرىلعان «Birgemiz» قوعامدىق قورىنان تەگىن ماسكالار الادى. بىرنەشە كۇننىڭ ىشىندە «Jas Otan» ەرىكتىلەرى نۇر-سۇلتان، الماتى جانە شىمكەنت قالالارىندا 100 مىڭنان استام وتباسىنا جەكە قورعانىس قۇرالدارىن جەتكىزەدى.
وتكەن تۇندە ەرىكتىلەر 5 ميلليون ماسكانى الدىن الا وراپ دايىندادى. بۇگىندە ولار ماسكالاردى تۇرعىنداردىڭ ءالسىز توپتارىنا، سونىڭ ىشىندە جالعىزباستى قارتتارعا، كوپبالالى جانە از قامتىلعان وتباسىلارعا، جەتىم بالالارعا، ارداگەرلەرگە، ەرەكشە قاجەتتىلىكتەرى بار جانە ت.ب. ازاماتتارعا جەتكىزۋدى باستاپ كەتتى.
سونىمەن قاتار، كۇنى كەشە نۇرسۇلتان نازاربايەۆ مۇقتاج ادامدارعا تىكەلەي اتاۋلى كومەك كورسەتۋدىڭ ەكىنشى تولقىنى باستالاتىنىن ايتتى. بۇعان دەيىن ەلباسىنىڭ تاپسىرماسىمەن «Birgemiz» قورىنان 152 مىڭنان استام وتباسىنا 50 مىڭ تەڭگە كولەمىندە ءبىرجولعى كومەك كورسەتىلدى. ەندى جينالعان قاراجاتتىڭ اياسىندا تاعى دا 200 مىڭنان استام تۇرمىسى تومەن وتباسىن قامتۋ جوسپارلانىپ وتىر. وتباسىلىق كوەففيسيەنتى ەسەپكە الا وتىرىپ، شامامەن 1 ميلليون ادامعا كومەك كورسەتىلەدى دەپ كۇتىلۋدە.
سونداي-اق، ەكىنشى تولقىن كەزىندە مۇقتاجداردى مۇمكىندىگىنشە كوبىرەك قامتۋ ماقساتىندا بۇرىن كومەك الماعان وتباسىلارعا باسىمدىق بەرىلەدى. جۋىق ارادا وبلىس اكىمدەرى مەن الەۋمەتتىك قورعاۋ ورگاندارى كومەك الۋشىلاردىڭ ءتيىستى تىزىمدەرىن ازىرلەيدى. كومەك كورسەتۋ مەرزىمى – مامىر ايىنىڭ باسى.
«Nur Otan» پارتياسىنىڭ جاستار قاناتى ازىق-تۇلىك جيىنتىقتارىن جەتكىزۋ جۇمىستارىن كۇشەيتتى. «Jas Otan» ەرىكتىلەرى بۇعان دەيىن بۇكىل ەل بويىنشا 56 مىڭ مۇقتاج وتباسىعا كومەك كورسەتكەن بولاتىن.
پىكىر قالدىرۋ