كارانتين جاعدايىنا بايلانىستى گۇلنۇر تەمىرحان قىزى جۇمىس ىستەيتىن جەكە تىگىن سەح ۋاقىتشا توقتاپ تۇر. وسى كۇردەلى كەزدە 42500 تەڭگەلىك جاردەماقى كادىمگىدەي كومەك بولدى دەيدى شەبەر.

– قازىرگى ۋاقىتتا قارجى جاعىنان قيىندىققا ۇشىراپ قالعان ازاماتتار ارامىزدا وتە كوپ. سولاردىڭ ءبىرى – ءوزىممىن. توتەنشە جاعدايعا بايلانىستى جۇمىسىمىز توقتاپ تۇر. وسىنداي قيىن جاعدايدا مەملەكەت تاراپىنان قولداۋ جاسالىپ جاتقانى قۋانتادى. مەن 42500 تەڭگەنى 42500.enbek.kz سايتى ارقىلى ءوتىنىم بەرىپ، الدىم. مەملەكەت تاراپىنان وسى كومەكتىڭ تاعايىندالعانىنا ۇلكەن راحمەتىمدى ايتامىن، – دەدى گ. تەمىرحان قىزى.

بۇگىنگە دەيىن 784 مىڭنان استام الماتىلىق توتەنشە جاعداي كەزىندە تابىسىنان ايىرىلعاندارعا ارنالعان 42 500 تەڭگەلىك جاردەماقىعا ءوتىنىم بىلدىرگەن. 238 مىڭ تۇرعىننىڭ ءوتىنىمى كەيىنگە قالدىرىلسا، قالعاندارىنا الەۋمەتتىك تولەم تاعايىندالعان.