Factcheck.kz سايتى ارمان شورايەۆ پەن ءالنۇر ىلياشيەۆتىڭ تۇتقىندالۋىنا بايلانىستى رەسمي مالىمدەمە جاسادى. مالىمدەمەنىڭ تولىق ءماتىنى تومەندە ۇسىنىلعان.
2020 جىلدىڭ 17 جانە 18 ساۋىرىندە الماتى مەن قاراعاندى قالالارىندا ازاماتتىق بەلسەندى ءالنۇر ىلياشيەۆ پەن بەلگىلى مەديامەنەدجەر جانە قوعام قايراتكەرى ارمان شورايەۆ ۇستالعان بولاتىن. ەكى جاعدايدا دا ق ر قك-نىڭ 274-بابى، ياعني كورىنەۋ جالعان اقپارات تاراتتى دەپ ايىپتالدى. قازىرگى ۋاقىتتا ىلياشيەۆتى ەكى اي قاماۋ تۋرالى شەشىم دە قابىلداندى.
ءبىز، جالعان اقپاراتپەن كۇرەسەتىن ۇيىم رەتىندە ارمان شورايەۆ پەن ءالنۇر ىلياشيەۆقا قاتىستى قابىلدانعان سانكسيالار شامادان تىس جانە ۇستاۋ مەن قاماۋعا الۋدىڭ سەبەپتەرى ايقىن ءارى اشىق ەمەس دەپ سانايمىز.
ينفودەميا كەزەنىندە، قازاقستان ازاماتتارى راسىندا جالعان اقپارات تاراتۋشىلار مەن الاياقتاردىڭ شابۋىلىنا ۇشىراپ جاتقان تۇستا جۋرناليست پەن ازاماتتىق بەلسەندىنى ۇستاۋ جانە تۇتقىنداۋ ازاماتتىق قوعامعا جاسالىپ جاتقان قىسىم جانە پىكىر ەركىندىگى قۇقىعىنىڭ بۇزىلۋى رەتىندە عانا ءتۇسىندىرىلۋى مۇمكىن.
ءبىز ق ر ءىىم. ق ر باس پروكۋراتۋراسىنان جانە ق ر ادىلەت مينيسترلىگىنەن قازاقستان ازاماتتارىنىڭ كونستيتۋسيالىق قۇقىقتارى مەن ەركىندىگىن بۇزۋعا جول بەرمەۋ ءۇشىن شارالار قابىلداۋعا شاقىرامىز. ارمان شورايەۆ پەن ءالنۇر ىلياشيەۆ ىستەرى پوليسيا جانە وزگە دە باقىلاۋشى ورگان قىزمەتتەرىنىڭ قىزمەت بابىن اسىرا پايدالانۋ تۇرعىسىنان مۇقيات تەرگەلۋگە ءتيىس.
تەرگەۋ بارىسىندا زاڭبۇزۋشىلىقتىڭ اۋىرلىعىنا ساي بارىنشا جەڭىلدەتىلگەن بۇلتارتپاۋ شاراسى قولدانىلۋى كەرەك. سونىمەن قاتار، ءبىز اتالمىش ءىس بويىنشا تەرگەۋ توقتاماعان جاعدايدا تولىعىمەن اشىق سوتتى تالاپ ەتەمىز. بىزگە قوسىلام دەگەن ب ا ق رەداكسيالارى مالىمدەمەنى ءوز سايتتارى مەن الەۋمەتتىك جەلىلەردەگى پاراقشالارىنا جاريالاپ، بىزبەن نيەتتەس ەكەندەرىن بىلدىرۋگە شاقىرامىز.
بۇل مالىمدەمە ءتيىستى ۆەدومستۆولارعا رەسمي حات ارقىلى جولداناتىن بولادى.
پىكىر قالدىرۋ