الماتى قالاسىنىڭ اكىمى باقىتجان ساعىنتايەۆ قحر دارىگەرلەرىنىڭ دەلەگاسياسىمەن ونلاين-رەجيمىندە كوروناۆيرۋسقا قارسى كۇرەس بويىنشا تاجىريبە الماسۋ ماسەلەلەرىن تالقىلادى.
قحر دارىگەرلەرى قالانىڭ مەديسينالىق مەكەمەلەرىندەگى جاعدايمەن، كوروناۆيرۋستىق ينفەكسيامەن اۋىراتىن ناۋقاستاردى ەمدەۋ جانە الدىن الۋ ادىستەرىمەن تانىستى. سونداي-اق مەديسينا قىزمەتكەرلەرىنە ارنالعان ءبىرقاتار وقىتۋ ترەنينگتەرىن وتكىزدى. جۇڭگو دەلەگاسياسىنىڭ قۇرامىندا پۋلمونولوگيا، جۇقپالى اۋرۋلار، قارقىندى تەراپيا، ەپيدەميولوگيا، قوعامدىق دەنساۋلىق ساقتاۋ سالاسىنداعى ساراپشىلار بار.
قالا اكىمى ب. ساعىنتايەۆپەن اڭگىمە بارىسىندا جۇڭگو ماماندارى قالانىڭ كوروناۆيرۋسقا قارسى كۇرەسكە دايىندىعىنىڭ جوعارى دەڭگەيىن، جاپپاي تەستىلەۋدىڭ ماڭىزدىلىعىن اتاپ ءوتتى. سونداي-اق ازاماتتاردىڭ كوروناۆيرۋس بويىنشا بارلىق الەۋەتتى بايلانىستارى ءۇشىن كارانتيندىك شارالاردىڭ ماڭىزدىلىعىن ايتتى.
سونىمەن قاتار قالا تۇرعىندارىنىڭ ءوزىن-وزى وقشاۋلاۋى جاقسى ۇيىمداستىرىلعان امال ەكەنىن ايتا كەلىپ، بۇل ينفەكسيا وشاعىنىڭ ۇلعايىپ، ىندەتتىڭ تارالۋىنا توسقاۋىل بولۋدىڭ بىردەن-بىر جولى ەكەنىن اتاپ ءوتتى.
كەزدەسۋدە ناۋقاستاردى جاپپاي تەستىلەۋ، پروفيلاكتيكالىق، ەمدەۋ جانە وڭالتۋ ادىستەرىنىڭ تيىمدىلىگى تالقىلاندى. مەديسينا قىزمەتكەرلەرىن دايىنداۋ مەن تۇراقتى وقىتۋعا ەرەكشە كوڭىل ءبولىندى. قالا اكىمى باقىتجان ساعىنتايەۆ كۆي-مەن كۇرەستە كومەك كورسەتۋگە كەلگەن قحر ماماندارىنا العىسىن ءبىلدىردى.
پىكىر قالدىرۋ