الماتى قالانىڭ باس يمامى ەركىنبەك شوقاي بۇگىن كەشكە مۇسىلمان جاماعاتى العاشقى تاراۋىق نامازىن ۇيدە وقىپ، سارەسىن دە ۇيدەن ىشەتىنىن ونلاين بريفينگتە ايتتى.

يسلامنىڭ ەسەپتەۋى بويىنشا ءتۇن كۇننەن بۇرىن جۇرەدى. بۇگىنگى كەش رامازاننىڭ العاشقى ءتۇنى بولىپ ەسەپتەلەدى. 

– اسا قامقور، ەرەكشە مەيىرىمدى اللانىڭ اتىمەن باستايمىن. بارشا ماقتاۋ الەمدەردىڭ راببىسى اللاعا ءتان، ونىڭ ەلشىسى مۇحاممەد پايعامبارىمىزعا سانسىز سالاۋات پەن يگىلىكتەر بولسىن! ايلاردىڭ سۇلتانى، شاراپاتى مول قاسيەتتى رامازان ايى قۇتتى بولسىن! وزدەرىڭىزگە ءمالىم، جۋىردا قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ الاڭىندا كارانتين جاعدايىنداعى رامازانعا قاتىستى پىكىرى مەن ءپاتۋاسىن ايتقان بولاتىن. سول ءپاتۋا بويىنشا شاريعات ۇكىمى مەن عىلىمي زەرتتەۋ جۇمىسىنىڭ قورىتىندىسىنا سايكەس، مۇسىلماندار اسىعا كۇتەتىن رامازان ايى بيىل ەلىمىزدە 24 ءساۋىر كۇنى باستالادى دەگەن شەشىم قابىلداندى، – دەدى باس يمام.

ەسكەرتە كەتەيىك، كارانتينگە بايلانىستى ەلىمىزدە ۋاقىتشا جيىن-تويلار وتكىزۋگە، اس بەرۋگە، ادامداردىڭ شوعىرلانۋىنا، ءتىپتى، مەشىتتەردە جاماعات بولىپ قۇلشىلىق ەتۋگە ۋاقىتشا تىيىم سالىندى. ارينە، بۇل ازاماتتارىمىزدىڭ دەنساۋلىعىن ساقتاۋ مەن جۇقپالى ىندەتتى اۋىزدىقتاۋ ءۇشىن جاسالعان شەشىم.

– باس ءمۇفتي ناۋرىزباي قاجى تاعان ۇلى جۇقپالى ىندەتتىڭ تارالۋىنىڭ الدىن الۋ ماقساتىندا تاراۋىق نامازى مەشىتتەردە جاماعاتپەن وقىلمايتىنىن جانە مەشىتتەردە، ءدامحانالاردا، قوعامدىق ورىنداردا، ت.ب. مەكەمەلەردە جينالىپ اۋىزاشار بەرۋگە ۋاقىتشا بولمايتىنىن جەتكىزدى. سوندىقتان قاسيەتتى رامازان ايىندا ورازا تۇتقان باۋىرلارىمىز ءوز ۇيىندە اۋىز اشقانى دۇرىس، – دەدى ە. شوقاي.

بيىل 19 مامىردان 20 مامىرعا قاراعان ءتۇن – قاسيەتتى ءقادىر ءتۇنى.