بەينەكونفەرەنسيا رەجيمىندە وتكەن كەزدەسۋ بارىسىندا كوروناۆيرۋس ىندەتىنە قارسى كۇرەستەگى ستراتەگيالىق ماسەلەلەر، سونداي-اق ەل ەكونوميكاسىن قالپىنا كەلتىرۋ جانە داعدارىستان كەيىنگى كەزەڭدە دامۋ ماسەلەلەرى قارالدى، دەپ جازادى Qamshy.kz اقپارات اگەنتتىگى elbasy.kz  سايتىنىڭ دەرەگىن نەگىزگە الىپ. 

ەلباسى جاھاندىق قاۋىپ-قاتەرلەر توڭىرەگىندەگى جاعداي الاڭداتارلىق سەناريي بويىنشا دامىپ جاتقانىن اتاپ ءوتتى.

– كوروناۆيرۋستىڭ سالدارى الەمدىك ەكونوميكانىڭ ماڭىزدى جۇيەلەرىنە اسەر ەتۋدە. حالىقارالىق ۆاليۋتا قورىنىڭ ساراپشىلارى قازىرگى «جاھاندىق كارانتيندى» وتكەن عاسىردا بولعان ۇلى دەپرەسسيامەن سالىستىرۋدا. ولاردىڭ پىكىرىنشە، جان باسىنا شاققانداعى تابىس كولەمى 170 ەلدە تومەندەيدى. ەكونوميكاسى ءالسىز ەلدەر كوبىرەك زارداپ شەگەتىن بولادى. ساراپشىلار وسى توقساندا پاندەميا مەن ەكونوميكالىق داعدارىستىڭ شارىقتاۋ شەگى قاتار كەلەدى دەگەن بولجام جاساپ وتىر. ونەركاسىپتىك ءوندىرىستىڭ قۇلدىراۋى ەكىنشى دۇنيەجۇزىلىك سوعىستان كەيىنگى كەزەڭدەگى ەڭ تومەن دەڭگەيگە جەتۋى مۇمكىن، - دەدى قازاقستاننىڭ ەكس-پرەزيدەنتى.

نۇرسۇلتان نازاربايەۆ جاقىن ارادا الەمنىڭ بارلىق مەملەكەتتەرى بۇدان دا اۋىر سىناقتارعا تاپ بولاتىنىن جانە ونىڭ ءبارى قازاقستاندى دا اينالىپ وتپەيتىنىن ايتتى.

– 20 ساۋىردە مۇناي باعاسى بۇرىن-سوڭدى بولماعان دەڭگەيگە ءتۇسىپ كەتتى. الەمدىك نارىقتاردىڭ تەڭگەرىمى بۇزىلدى. پاندەميانىڭ سوڭى جانە ءوندىرىستىڭ جاپپاي قۇلدىراۋى جاھاندىق قارجى داعدارىسىنا ۇلاسادى دەگەن دە بولجام بار. كەلەسى كەزەڭ – الەمدىك ازىق-تۇلىك داعدارىسى بولۋى مۇمكىن. بۇل شيەلەنىستەر مەن قاقتىعىستارعا اكەلۋى ىقتيمال، - دەدى نازاربايەۆ.