بۇگىن «ايالا» قايىرىمدىلىق قورى «ءومىر سىيلايىق» جوباسىنىڭ اياسىندا «شيەۆرون» كومپانياسىنىڭ قارجىلىق قولداۋىمەن الماتى قالاسى بالالار قالالىق كلينيكالىق جۇقپالى اۋرۋلار اۋرۋحاناسىنا (بقكجاا) جالپى سوماسى 71،8 ملن تەڭگەنى قۇرايتىن Humming Vue (جاپوندىق) ەكى جاڭا جاساندى وكپە ۆەنتيلياسياسى اپپاراتىن قازاقستاندا COVID-19 اۋرۋىمەن كۇرەسۋ ماقساتىندا تاپسىردى. بۇل تۋرالى almaty.tv حابارلادى. 

«شيەۆرون» كومپانياسىنىڭ جۇرتشىلىقپەن بايلانىس جونىندەگى ۇيلەستىرۋشىسى جانار قوشپانوۆانىڭ ايتۋىنشا، وسى جابدىق بالالار جۇقپالى اۋرۋلار اۋرۋحاناسىنىڭ دارىگەرلەرىنە تەزىرەك جانە تيىمدىرەك كومەك كورسەتۋگە مۇمكىندىك بەرەدى، ويتكەنى جانساقتاۋ بولىمىندە ءبىر مينۋتتى دا جوعالتۋعا بولمايدى.

– بۇگىنگى تاڭدا ءىرى بيزنەس پەن قازاقستاننىڭ ۇكىمەتى جاڭا كوروناۆيرۋستىڭ تارالۋىن توقتاتۋ جانە اۋىرعاندارعا جازىلۋعا كومەكتەسۋگە بار كۇشىن سالۋدا. ورناتىلعان يۆل اپپاراتتارىمەن قوسا دارىگەرلەر ونى پايدالانۋدى ۇيرەنىپ، كەپىلدى تەحنيكالىق قولداۋعا يە بولادى. ءبىز جاڭا يۆل اپپاراتتارى تەك پاندەميا كەزىندە عانا ەمەس، داعدىلى جاعدايدا دا بالالاردىڭ ءومىرىن ساقتاۋعا كومەكتەسەدى دەپ سەنەمىز. «شيەۆرون» كومپانياسىنىڭ اتىنان مەن بارلىق قازاقستاندىقتارعا زور دەنساۋلىق جانە وسى كۇردەلى كەزەڭنەن امان-ەسەن وتۋگە كۇش-قۋات تىلەيمىن، – دەدى جانار قوشپانوۆا.

Humming Vue يۆل اپپاراتتارى سوڭعى بۋىنعا جاتادى جانە قىسىمدى 13 ميكرون دەڭگەيىندە باقىلاۋعا كومەكتەسەدى، بۇل بالالاردى بارو-جاراقاتتاۋ ءقاۋپىن ازايتىپ، رەسپيراتورلىق تەراپيانىڭ كلينيكالىق تيىمدىلىگىن ارتتىرادى. ولاردى ستەريلدەۋ وتە وڭاي جانە كەيىن قايتا مولشەرلەۋدى تالاپ ەتپەيدى، بۇل ونى كەلەسى پايدالانۋعا دايىنداۋ ۋاقىتىن ايتارلىقتاي قىسقارتادى. بۇل اپپاراتتار رەجيمدەردى اۋىستىرىپ قوسۋ كەزىندە ءارتۇرلى تىنىس بەرۋ كونتۋرلارىن اجىراتپاي نەمەسە اۋىستىرماي پاسيەنتتەردىڭ وكپەسىن جەلدەتۋگە مۇمكىندىك بەرەدى، بارلىعىن ءبىر كونتۋردا ىسكە اسىرىپ، اۋىر گيپوكسيا ءقاۋپىنىڭ ارتۋىنا جول بەرمەيدى.

2019 جىلى بقكجاا شامامەن 100 مىڭ جاس پاسيەنتتى قابىلدادى، ونىڭ تورتتەن ءبىر بولىگى اۋرۋحاناعا جاتىپ شىقتى. وسى اۋرۋحانانىڭ جانساقتاۋ بولىمىنە بىلتىر شامامەن 500 بالا جاتقىزىلدى، ولاردىڭ بەستەن ءبىر بولىگى يۆل اپپاراتىنا قوسىلدى. جانساقتاۋ ءبولىمى پاسيەنتتەرىنىڭ شامامەن 60%-ى پنيەۆمونيا جانە 3-دارەجەلى تىنىس جەتكىلىكسىزدىگى دياگنوزدارىمەن تۇسكەن.

«ايالا» قايىرىمدىلىق قورى كوپ جىلدان بەرى بقكجاا-مەن «ءومىر سيىلايىق» رەسپۋبليكالىق جوباسى اياسىندا بەلسەندى تۇردە ارەكەت ەتەدى. جابدىقتىڭ جانە اپپاراتۋرانىڭ، سونىڭ ىشىندە قور 2007 جىلى جانساقتاۋ بولىمىنە بەرگەن يۆل اپپاراتتارىنىڭ كومەگىمەن اۋرۋحاناداعى بالالار ءولىمى 4-ەسە ازايدى.

جالپى وسى جوبانى ىسكە اسىرعان 13 جىلدىڭ ىشىندە «ايالا» قورى قازاقستاننىڭ 30 اۋرۋحاناسى مەن پەرزەنتحاناسىنا جالپى 389 380 567 تەڭگە سوماسىندا جابدىق تاپسىردى. وسىنىڭ ارقاسىندا قازاقستانداعى ون مىڭداعان بالانىڭ ءومىرى قۇتقارىلدى.