تۇركىستان وبلىسى ماقتاارال اۋدانىنداعى سۋ تاسقىنى بارشا جۇرتتى الاڭداتىپ وتىر. قازىرگى تاڭدا اتالعان ايماقتا 4 ەلدى مەكەننەن 5400 ادام ەۆاكۋاسيالاندى.

تۇرعىنداردىڭ ءبىرازى تۋىس-تۋعانىنا كەتسە، ءۇش مىڭعا جۋىعى ماقتاارال اۋدانى، اتاكەنت كەنتىندەگى 10 مەكتەپكە ءبولىپ ورنالاستىرىلدى. ازىق-تۇلىك، ىستىق تاماقپەن تولىق قامتاماسىز ەتىلدى.

اتاپ وتەيىك، كورشىلەس جەتىساي اۋدانى COVID-19 ينفەكسياسىنىڭ وبلىستاعى بىردەن ءبىر وشاعى بولىپ تابىلاتىندىقتان، كوپشىلىگىن قازىرگى تاڭدا وسى ساۋال الاڭداتۋدا. وبلىستىق دەنساۋلىق ساقتاۋ باسقارماسىنىڭ مالىمەتىنشە، جەتىساي اۋدانىنداعى ينفەكسيالىق اۋرۋحانادا وبلىس بويىنشا 32 ناۋقاس ەم الىپ جاتسا، ماقتاارال اۋدانىنىڭ اۋرۋحانالارىندا بىردە-بىر ناۋقاس جوق.

دارىگەرلەر قازىرگى تاڭدا ەۆاكۋاسيالانعان حالىقتى ىندەتتەن ساقتاۋ بويىنشا بارلىق شارانى قولعا الدى. حالىققا انتيسەپتيك، بەتپەردە، قولعاپ تەگىن تاراتىلىپ، ءار ازاماتتىڭ دەنە قىزۋى تەپلوۆيزورمەن تەكسەرىلۋدە.

تۇركىستان وبلىسى اكىمىنىڭ باسپا ءسوز قىزمەتى