جامبىل وبلىسىندا 43 ناۋقاس كوروناۆيرۋستان جازىلىپ، اۋرۋحانادان شىعارىلدى. بۇل تۋرالى جامبىل وبلىسى اكىمىنىڭ ورىنباسارى ەرجان جىلقىبايەۆ وڭىرلىك كوممۋنيكاسيالار قىزمەتىندەگى بريفينگتە ايتتى.
وبلىستا جالپى 113 ادام ىندەت جۇقتىرعان. بۇگىنگە دەيىن 1784 ادام كارانتيننەن شىعارىلدى.
– جامبىل وبلىسىندا كوروناۆيرۋس جۇقتىرعانداردى انىقتاۋ ءۇشىن 6 لوبوراتوريا جۇمىس ىستەپ تۇر. بۇگىنگى كۇنى كوروناۆيرۋس ىندەتىنە تەستىلەۋدەن 6700 ادام ءوتتى، – دەدى ەرجان جىلقىبايەۆ.
ونىڭ سوزىنشە، وبلىس اۋماعىندا ورنالاتىلعان بارلىق 48 بلوكپوست جۇمىسى كۇشەيتىلگەن.
سونداي-اق ول وبلىس تۇرعىندارىنا ارنالعان الەۋمەتتىك قولداۋ شارالارى تۋرالى ايتتى.
– جامبىل وبلىسى بويىنشا 119 000 تۇرعىننىڭ 15 000 تەڭگە كولەمىندە كوممۋنالدىق شىعىندارى وتەلەتىن بولادى. 2020 جىلى كەمىندە 30 مىڭ جۇمىس ورنى اشىلادى. وبلىس اۋماعىندا 831 ينفراقۇرىلىمدىق جوبانى ىسكە اسىرامىز، – دەدى وبلىس اكىمىنىڭ ورىنباسارى.
سونداي-اق قورداي اۋدانى بويىنشا 141 جوباعا 12 ملرد تەڭگە قارجى بولىنبەك.
ەرجان جىلقىبايەۆ تۇرعىنداردى كوروناۆيرۋستىڭ تارالۋىن توقتاتۋ شارالارىنا تۇسىنىكپەن قاراۋعا شاقىردى.
– ەلىمىز ءۇشىن قيىن قىستاۋ زاماندا، باتىر باۋىرجان مومىش ۇلى بابامىزدىڭ "ءتارتىپسىز ەل بولمايدى، تارتىپكە باس يگەن قۇل بولمايدى" دەگەن ءسوزىن ەستەن شىعارماعانىمىز ابزال. جەرگىلىكتى اتقارۋشى جانە قۇقىققورعاۋ ورگاندارى، دەنساۋلىق ساقتاۋ ۇيىمدارى تاراپىنان قابىلدانىپ جاتقان ىندەتتىڭ الدىن الۋ ءۇشىن قابىلدانعان شارالارعا تۇسىنىستىكپەن قاراپ، كارانتين رەجيمىن بۇزباۋعا شاقىرامىن. ول ءۇشىن ۇيدە بولۋلارىڭىزدى سۇرايمىن. وتپەلى كەزەڭدە، قيىندىقتى بىرگە جەڭەمىز!، – دەدى ول بريفينگ بارىسىندا.
جامبىل وبلىسى اكىمىنىڭ باسپا ءسوز قىزمەتى
پىكىر قالدىرۋ