ءتىل – ۇلتتىڭ تۇعى­رى، ۇرپاقتىڭ عۇمىرى. قازاق ءتىلى قازاقتى الەمگە تانىتا الادى. بۇل تۋرالى ق ر پرەزيدەنتى قاسىم-جومارت توقايەۆ «Egemen Qazaqstan» گازەتىنە بەرگەن سۇحباتىندا ايتتى.

– الەمدە ءتۇرلى ۇردىستەر قالىپتاسۋدا. ءبىراق سونىڭ ءبارى بىردەي ۇلتتىق مۇددەگە ساي كەلە بەرمەيدى. نەگىزگى قاۋىپ-قاتەرلەر الدا. سوندىقتان قىراعىلىق ساقتاي وتىرىپ، قيىندىقتاردى ەڭسەرۋگە ءاردايىم دايىن بولۋىمىز كەرەك. جاڭا سىن-سىناققا توتەپ بەرۋ ءۇشىن، ەڭ الدىمەن، ۇلتتىق قۇندىلىقتاردى قور­عاي بىلگەن ءجون. انا ءتىلىمىزدى، ءسالت-داستۇرىمىزدى، ۇلتتىق سانا-سەزىمدى، قوعام­داعى تاتۋلىق پەن كەلىسىمدى، بەرەكە-بىر­لىكتى ساقتاي الماساق، كەلەر ۇرپاق ءبىزدى كەشىرمەيدى. اسىرەسە مەملەكەتتىك ءتىلدىڭ ماسەلەسى وتە ماڭىزدى. ءتىل – ۇلتتىڭ تۇعى­رى، ۇرپاقتىڭ عۇمىرى. قازاق ءتىلى قازاقتى الەمگە تانىتا الادى. حالىقتىڭ ءتىلى – حالىقتىڭ ءتولقۇجاتى. مۇنى ءاردايىم ەستە ۇستاۋ كەرەك. بىلە بىلسەك، ۇلتتىق قاۋىپسىزدىك ءتىلىمىزدى قادىرلەۋدەن باستالادى،  – دەدى پرەزيدەنت.

سونداي-اق، پرەزيدەنت "سيفرلى قازاقستان" مەملەكەتتىك باعدارلاماسىنداعى كەمشلىكتەر تۋرالى دا ايتتى.

– بۇگىندە سيفرلى تەحنولوگيالار قار­قىندى دامىپ، قوعامدىق ءومىردىڭ ءتۇرلى سالاسىنا دەندەپ ەنىپ كەلەدى. ءبىز وسى ۇردىسكە باسا ءمان بەرىپ وتىرمىز. بۇل – قازىرگى زاماننىڭ باستى تالابى. مۇنى كوروناۆيرۋس ىندەتىنە بايلانىستى تۋىنداعان كۇردەلى كەزەڭ انىق اڭعارتتى. مەنىڭ تاپسىرمام بويىنشا ۇكىمەت "سيفرلى قازاقستان" مەملەكەتتىك باعدارلاماسىندا انىقتالعان كەمشىلىكتەردى ەسكەرىپ، قايتا قارايدى. سيفرلاندىرۋ ۇدەرىسى ەلىمىزدى وركەندەتۋگە تىڭ سەرپىن بەرەتىنى ءسوزسىز. ونىڭ ءمان-ماڭىزى ارتا بەرمەك، – دەپ تولىقتىردى قاسىم-جومارت توقايەۆ.