تۇركىستان وبلىستىق ءماسليحاتىنىڭ جانە بارلىق اۋداندىق، قالالىق ءماسليحاتتاردىڭ دەپۋتاتتارى «Nur Otan» پارتياسىنىڭ «ءبىز بىرگەمىز» رەسپۋبليكالىق اكسياسى اياسىندا سۋ تاسقىنىنان زارداپ شەككەن ماقتاارال اۋدانىنىڭ تۇرعىندارىنا 7 بىردەي جۇك كولىگىنە تيەلگەن گۋمانيتارلىق كومەك جونەلتتى. بۇل قايىرىمدىلىق شاراسىن ۇيىمداستىرۋعا تۇركىستان وبلىستىق ءماسليحاتىنىڭ حاتشىسى قايرات بالابييەۆتىڭ ءوزى ۇيىتقى بولعانىن ايتا كەتۋ كەرەك.

اتالعان كەرۋەندى شىعارىپ سالۋ شاراسىنا وبلىس اكىمى ءومىرزاق شوكەيەۆ ارنايى قاتىسىپ، وسىنداي قىسىل-تاياڭ ۋاقىتتا ماقتاارالدىقتارعا كومەك قولىن سوزعان ازاماتتارعا العىسىن ءبىلدىردى. ول سونداي-اق بۇگىنگى تاڭدا ماقتاارال اۋدانىندا تاسقىن سۋدىڭ بەتىن قايتارۋ بويىنشا اتقارىلىپ جاتقان جۇمىستاردى باياندادى.

«اپات ايتىپ كەلمەيدى. ماقتاارال اۋدانىندا ءدال قازىرگى ۋاقىتتا ءقاۋىپتىڭ بەتى قايتا باستادى. اتالعان اۋدان دا مىڭعا جۋىق مامان جۇمىس ىستەپ جاتىر. 3،5 مىڭنان استام تۇرعىن ەۆاكۋاسيا ورىندارىنا جايعاستىرىلعان. ولارعا ءبىز بارلىق ءتيىستى كومەكتەردى كورسەتۋىمىز قاجەت. وسى رەتتە ەلدىڭ سونىڭ ىشىندە دەپۋتاتتاردىڭ وسىنداي باستاما كوتەرىپ، حالىققا بولىسۋى كوڭىل قۋانتادى. ەڭ باستىسى – حالىققا سابىر مەن توزىمدىلىك قاجەت. الداعى ۋاقىتتا تاسقىن سۋدان كەلگەن شىعىندار تولىق ەسەپتەلىپ، جاڭا ۇيلەر بوي كوتەرىپ، جولدار جوندەلىپ قالىپتى ءومىر باستالاتىنىنا سەنىمدىمىز»، – دەدى ءومىرزاق ەستاي ۇلى.

ايتا كەتەيىك، جالپى سومماسى 21 ملن. تەڭگە بولاتىن كەرۋەنىندە ازىق-تۇلىك تاۋارلارىنان بولەك، كيىم-كەشەك، جەكە باس گيگيەناسىنا ارنالعان تاۋارلار دا جەتكىلىكتى. ياعني، كەرۋەندە 11،7 توننا ۇن، 2،9 توننا كۇرىش، 3،6 توننا قانت، 2،8 توننا ماكارون، 1،5 توننا ەت، 900 كەلى جۋىق ءسۇت ونىمدەرى، 2،8 توننا كارتوپ، 1،7 توننا پياز، 1،3 توننا ءسابىز جانە تاعى باسقا دا ازىق-تۇلىك ونىمدەرى بار.

اتالعان كەرۋەن ءتۇساۋا ماقتاارال اۋدانى اتاكەنت كەنتىندە ورنالاسقان ارنايى قويماعا كەلىپ جەتەدى دەپ كۇتىلۋدە.

تۇركىستان وبلىسىنىڭ وڭىرلىك كوممۋنيكاسيالار قىزمەتى