تۇركىستان وبلىسى وڭىرلىك كوممۋنيكاسيالار قىزمەتىنىڭ الاڭىندا ماقتاارالداعى سۋ تاسقىنىنىڭ سالدارىن جويۋعا قاتىستى بريفينگ ءوتتى. بۇل تۋرالى Qamshy.kz اقپارات اگەنتتىگى قازاقپارات حابارلايدى.
وعان تۇركىستان وبلىسى اكىمىنىڭ ورىنباسارى ساكەن قالقامانوۆ پەن وزبەكستان رەسپۋبليكاسىنىڭ توتەنشە جاعدايلار ءمينيسترىنىڭ ءبىرىنشى ورىنباسارى ابدۋللا قۇلداشيەۆ جانە تۇركىستان وبلىسى توتەنشە جاعداي دەپارتامەنتىنىڭ باستىعى نۇرعالي ءجۇنىسوۆ قاتىستى.
بريفينگكە قاتىسقان وزبەكستان رەسپۋبليكاسىنىڭ تجم ءبىرىنشى ورىنباسارى ابدۋللا قۇلداشيەۆ تەحنوگەندىك اپات ايماعىندا جەرگىلىكتى اكىمشىلىك پەن تجد قىزمەتكەرلەرى جۇيەلى جۇمىس اتقارىپ جاتقانىن اتاپ ءوتتى.
– وزبەكستان رەسپۋبليكاسىنىڭ پرەزيدەنتى ش.ميرزيەيەۆتىڭ تاپسىرماسى بويىنشا ماقتاارال اۋدانىنا كەلدىك. سۋ باسقان ايماققا 300-دەن استام قىزمەتكەر، 186 تەحنيكامىز جۇمىلدىرىلعان. ونىڭ ىشىندە قۇتقارۋعا ارنالعان، ينجەنەرلىك، سۋ تاسۋ، جۇك كولىكتەرى بار. جەرگىلىكتى ارىپتەستەرىمىزبەن تىعىز قارىم-قاتىناستا تاۋلىك بويى وسىمەن 3 كۇن جۇمىس ىستەۋدەمىز. قازىرگى مىندەتىمىز - كوللەكتورلاردى تازارتۋ، سۋ تاسىعان جەرلەردى قالپىنا كەلتىرۋ. 50-دەن استام سۋ تارتۋ ناسوسى كۇندىز-تۇنى جۇمىس ىستەپ تۇرعاندىقتان، كەشە 34 مىڭ كۋب سۋ سىرتقا شىعارىلدى. ناتيجەسىندە فيردوۋسي اۋىلىندا سۋ دەڭگەيى ايتارلىقتاي تومەندەدى. ءبىز ايماقتاعى توتەنشە جاعداي اياقتالعانشا وسىندا بولامىز، – دەدى ابدۋللا حاميدوللا ۇلى.
بريفينگ بارىسىندا مەملەكەتتىك كوميسسيا شەشىمىمەن جۇزەگە اسىپ جاتقان جۇمىستاردى اتاپ وتكەن وبلىس اكىمىنىڭ ورىنباسارى ساكەن قالقامانوۆ جەڭىس، جاڭاتۇرمىس، دوستىق اۋىلدارى تولىقتاي كوشىرىلەتىنىن، ول ءۇشىن مىرزاكەنت اۋىلىنان 500 تۇرعىن ءۇي سالۋعا 50 گەكتار جەر بەلگىلەنگەنىن اتاپ ءوتتى.
– رەسەيلىك كاسىپكەر الىشەر ۋسمانوۆ سۋ تاسقىنىنان زارداپ شەككەن ماقتاارال اۋدانىنىڭ ەۆاكۋاسيالانعان 30420 تۇرعىنى ءۇشىن «تۇركىستان» الەۋمەتتىك دامۋ كورپوراتيۆتىك قورىنا 5 ملن 202 مىڭ اقش دوللارىن اۋداردى. بۇل قاراجات ەۆاكۋاسيالانعان 5202 وتباسىنىڭ جەكە شوتتارىنا تۇسەتىن بولادى. سونداي-اق، قورعا وتاندىق كاسىپكەرلەر مەن ازاماتتاردان 160 ملن تەڭگەگە جۋىق قارجى ءتۇستى. جينالعان قارجى زارداپ شەككەن وتباسىلارعا باعىتتالادى. گۋمانيتارلىق كومەك رەتىندە شتاب قويماسىنا 270 توننا ازىق-تۇلىك ءتۇستى، ونىڭ بۇگىندە 90 تونناسى ەلگە تاراتىلدى، – دەدى ساكەن قالقامانوۆ.
تۇركىستان وبلىسى تجد باستىعى نۇرعالي ءجۇنىسوۆ بريفينگتە اپات ايماعىنا ەلىمىزدىڭ قورعانىس سالاسىنان 1000-نان استام ماماننىڭ جۇمىلدىرىلعانىن جەتكىزدى.
– قازىرگى تاڭدا سۋدىڭ دەڭگەيى تومەندەۋدە. ورگەباس، نۇرلى جول، فيردوۋسي، جەڭىس ەلدىمەكەندەرىندە سۋ سورۋ جۇمىستارى جالعاسۋدا. قورعانىس مينيسترلىگى، ۇلتتىق ۇلان، تجد مەن پوليسيا دەپارتامەنتىنەن 1365 ادام جۇمىس اتقارۋدا. ماسەلەن، 75 موتوپومپا سۋ سورۋ جۇمىستارىندا، 44 قايىق سۋ باسقان ەلدىمەكەندەردە تۇرعىنداردىڭ ۇيلەرىنەن زاتتارىن تاسۋ جۇمىستارىنا جۇمىلدىرىلعان، – دەدى نۇرعالي ءجۇنىسوۆ.
پىكىر قالدىرۋ