9 مامىر كۇنى ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتى ءدىنتانۋ جانە مادەنيەتتانۋ كافەدراسىنىڭ دوسەنتى، فيلوسوفيا عىلىمدارىنىڭ دوكتورى بەيسەنوۆ باعدات قابىلدا ۇلى قايتىس بولدى.
باعدات بەيسەنوۆ 1968 جىلى 14 ناۋرىزدا تۇركىستان وبلىسى وتىرار اۋدانى ءشاۋىلدىر اۋىلىندا دۇنيەگە كەلگەن.
ول 1996 جىلى ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا ءبولىمىنىڭ باكالاۆرياتىن ءتامامداعان.
1998-2000 جىلدارى ءال-فارابي اتىنداعى قازۇۋ فيلوسوفيا جانە ساياساتتانۋ فاكۋلتەتىنىڭ اسپيرانتۋراسىندا وقىعان.
2001-2010 جىلدارى عىلىم فيلوسوفياسى جانە ءدىنتانۋ كافەدراسىنىڭ اسسيستەنتى، وقىتۋشىسى، اعا وقىتۋشىسى، دوسەنتى قىزمەتىن اتقارعان.
2002 جىلى فيلوسوفيا تاريحى ماماندىعى بويىنشا "ءماشھۇر ءجۇسىپ كوپەي ۇلىنىڭ الەۋمەتتىك فيلوسوفياسى" تاقىرىبىندا كانديداتتىق ديسسەرتاسيا قورعادى.
2004 جىلى مەملەكەتتىك "مادەني مۇرا" باعدارلاماسىنا اۋدارماشى رەتىندە قاتىسقان.
2010 جىلى ءدىنتانۋ، فيلوسوفيالىق انتروپولوگيا، مادەنيەت فيلوسوفياسى ماماندىعى بويىنشا "قازاق رۋحانياتىنداعى يسلام قۇندىلىقتارى" اتتى دوكتورلىق ديسسەرتاسيانى تابىستى قورعاعان.
1 وقۋ قۇرالىنىڭ، تيپتىك باعدارلامالاردىڭ اۆتورى، 5 وقۋ قۇرالىنىڭ سواۆتورى. 70-تەن استام عىلىمي ماقالا جازعان.
"ۇلتتىق قاۋىپسىزدىك اياسىنداعى ءدىني ايقىندالۋ ماسەلەسى" (2007-2009 جج.)، "ۇلتتىق يدەيا اياسىنداعى قازاقستانداعى دىندەر" (2008 ج.)، "قازىرگى زامانداعى ءدىننىڭ ءرولى" (2011 ج.) سەكىلدى ق ر بعم تاراپىنان بولىنەتىن ىرگەلى جوبالار اياسىندا عىلىمي قىزمەتكەر رەتىندە عىلىمي زەرتتەۋلەرمەن اينالىستى.
بەيسەنوۆ قابىلدا ۇلى فاكۋلتەت پەن كافەدرا تاراپىنان تاپسىرىلعان قوعامدىق جۇمىستاردى جاۋاپكەرشىلىكپەن، ۋاقىتىندا اتقاردى. عىلىمي-زەرتتەۋ جۇمىسىن ۇستازدىق قىزمەتپەن ساباقتاستىرا بىلەتىن، جاۋاپكەرشىلىگى مول، ارىپتەستەرى اراسىندا قۇرمەتكە يە قىزمەتكەر بولعان.
ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىنىڭ ۇجىمى بەيسەنوۆ باعدات قابىلدا ۇلىنىڭ دۇنيەدەن وزۋىنا بايلانىستى مارقۇمنىڭ وتباسى مەن تۋىستارىنا قايعىرىپ، كوڭىل ايتادى.
