الماتىدا توتەنشە جاعداي اياقتالدى. دەگەنمەن كارانتين رەجيمى  ءالى جالعاسادى. بۇل شەشىمدى قالا اكىمدىگى جانىنان توتەنشە جاعداي رەجيمىن قامتاماسىز ەتۋ جونىندەگى جەدەل شتاب قابىلدادى.

سونداي-اق قالانىڭ پەريمەترى بويىنشا ورنالاسقان بلوك-بەكەتتەردىڭ جۇمىسى بۇرىنعى كۇشەيتىلگەن رەجيمدە جۇمىس ىستەيدى. 

"قالادا جۇرگەندە سانيتارلىق-ەپيدەميولوگيالىق قاۋىپسىزدىك نورمالارى قاتاڭ ساقتالۋى ءتيىس. وعان قوسا شتابتىڭ شەشىمىمەن قالادا جۇمىس ىستەۋگە رۇقسات ەتىلگەن كاسىپورىندار مەن مەكەمەلەردىڭ قىزمەتكەرلەرىنە عانا ءجۇرىپ-تۇرۋعا بولادى. قالا تۇرعىندارى كارانتين مەن سانيتارلىق-ەپيدەميولوگيالىق نورمالاردى قاتاڭ ساقتاۋ كەرەك. كارانتين رەجيمىن بۇزۋ (قىزمەتتى رۇقساتسىز جۇزەگە اسىرۋ، ونىڭ ىشىندە جۇمىسقا شىعۋ) قازاقستان رەسپۋبليكاسىنىڭ زاڭناماسىندا كوزدەلگەن دەربەس جانە قىلمىستىق جاۋاپكەرشىلىككە اكەپ سوعادى"، - دەلىنگەن حابارلامادا. 

كارانتين جاعدايىندا كىمدەرگە جۇمىس ىستەۋگە رۇقسات بەرىلگەن؟

• مەملەكەتتىك جانە قۇقىق قورعاۋ ورگاندارى؛

• كوممۋنالدىق قىزمەتتەر؛

• ونەركاسىپ؛

• قۇرىلىس؛

• جوبالىق ۇيىمدار؛

• جىلجىمايتىن مۇلىك اگەنتتىكتەرى؛

• حقكو (زاڭدى تۇلعالارعا قىزمەت كورسەتۋ ءۇشىن)؛

• نوتاريۋستار؛

• ادۆوكاتۋرا؛

• ازىق-تۇلىك دۇكەندەرى مەن بازارلار؛

• كافەلەر مەن مەيرامحانالار (وزىمەن الىپ كەتۋگە عانا بولادى)؛

• مەديسينالىق كلينيكالار؛

• ستوماتولوگيا؛

• زەرتحانالار؛

• ءدارىحانا؛

• كولىك جانە لوگيستيكا؛

• ديستريبۋسيا؛

• جقس؛

• ونلاين جەتكىزۋ؛

• ەكىنشى دەڭگەيلى بانكتەر جانە باسقا دا قارجى ۇيىمدارى (50%-كە دەيىن)؛

• ساقتاندىرۋ؛

• لومباردتار؛

• بيزنەسكە ارنالعان كاسىبي قىزمەتتەر (كونسالتينگ، اۋديت جانە بۋحگالتەرلىك قىزمەتتەر)؛

• اقپاراتتىق-كوممۋنيكاسيالىق تەحنولوگيالار؛

• ازىق-تۇلىك ەمەس دۇكەندەر، جالپى اۋدانى 500 م2 دەيىن؛

• تقس، كولىك جۋۋ جانە شينومونتاجداۋ؛

• شاشتاراز؛

• فوتوسالوندار؛

• گۇل پاۆيلوندارى؛

• حيميالىق تازارتۋ (كىر جۋۋ ورىندارى)؛

• تەحنيكا جانە اياق كيىم جوندەۋ ورىندارى؛

• باسپا ۇيلەرى؛

• ايىرباستاۋ پۋنكتتەرى؛

• ۆەتەرينارلىق قىزمەتتەر.

سونىمەن قاتار قالاداعى قوعامدىق كولىكتىڭ جۇمىس ءتارتىبى وزگەرىسسىز قالادى (ساعات 06.00-دەن 19.00-گە دەيىن).