قازاقستان حالقى اسسامبلەياسى تۇركىستان وبلىسى ماقتاارال اۋدانىندا سۋ تاسقىنىنان زارداپ شەككەن تۇرعىندارعا 16 جۇك كولىگىمەن 180 توننا گۋمانيتارلىق كومەك جىبەردى، دەپ قازاقپارات حابارلادى. 

گۋمانيتارلىق كومەكتى الماتى وزبەك ەتنومادەني بىرلەستىگى، قازاقستان ۇيعىرلارىنىڭ رەسپۋبليكالىق ەتنومادەني بىرلەستىگىنىڭ فيليالى، الماتى قالالىق ۇيعىر ەتنومادەني بىرلەستىگى، دۇنگەن قوعامىنىڭ الماتىداعى فيليالى، سونداي-اق «احىسكا» تۇرىك ەتنومادەني بىرلەستىگى جانە باسقا دا ورتالىقتار ۇيىمداستىردى.

جاساقتالعان كەرۋەن جولعا شىعار الدىندا قازاقستان حالقى اسسامبلەياسى ءتوراعاسىنىڭ ورىنباسارى جانسەيىت تۇيمەبايەۆ اقجول تىلەپ، قايىرىمدىلىق كومەككە اتسالىسقان ەتنوس وكىلدەرىنە العىس ءبىلدىردى.

– شىمكەنت قالاسىنداعى دوستىق ءۇيىنىڭ بازاسىندا رەسپۋبليكالىق اسسامبلەيانىڭ كومەك كورسەتۋ شتابى جۇمىس ىستەيدى. ەلىمىزدىڭ بارلىق وڭىرلەرى اسسامبلەيانىڭ ۇندەۋىنە قۇلاق اسىپ، ەكونوميكالىق قيىندىقتار مەن كارانتينگە قاراماستان، بارىنشا كومەك كورسەتۋدە. «جاڭعىرۋ جولى» رەسپۋبليكالىق جاستار قوزعالىسى، اسسامبلەيانىڭ ۆولونتەرلەر قوزعالىسىنىڭ ورتالىقتارى، قحا-نىڭ باسقا قۇرىلىمدىق بولىمشەلەرى جانە بەلسەندىلەر قوسىلدى. مەن وسى قايىرىمدىلىق اكسياسىنىڭ بارلىق قاتىسۋشىلارىنا العىس ايتامىن، – دەدى جانسەيىت تۇيمەبايەۆ.

ايتا كەتۋ كەرەك، قحا تۇركىستان وبلىسىنا گۋمانيتارلىق كومەكتىڭ ەكىنشى پارتياسىن جىبەردى. ءبىرىنشى كەزەڭ اياسىندا 23 ملن 325 مىڭ تەڭگەگە گۋمانيتارلىق كومەك كورسەتىلدى.