قاسىم-جومارت توقايەۆ الماتىدا قولعا الىنعان ءبىرقاتار ينفراقۇرىلىمدىق جوبامەن تانىستى، - دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.
مەملەكەت باسشىسى الماتى قالاسىنا جۇمىس ساپارى بارىسىندا جۇزەگە اسىرىلىپ جاتقان ينفراقۇرىلىمنىڭ جوبالارىمەن تانىستى.
قازاقستان پرەزيدەنتىنە الماتىنىڭ حالىقارالىق اۋەجايىن قايتا جوندەۋ جوسپارى تانىستىرىلدى.
تۇركيانىڭ TAV airport Holding كومپانياسى باس ديرەكتورىنىڭ ورىنباسارى سەركان كاپتان قاسىم-جومارت توقايەۆقا اۋەجايدىڭ جاڭا تەرمينالىنىڭ قۇرىلىسى تۋرالى مالىمەت بەردى. جالپى كولەمى 55 مىڭ شارشى مەتر بولاتىن تەرمينال جوباسىنىڭ قۇنى 150 ميلليون ەۆرو. تەرمينال جىلىنا 6 ميلليون جولاۋشىعا قىزمەت كورسەتەدى. اتالعان نىساننىڭ قۇرىلىسى 2022 جىلدىڭ 2-توقسانىندا اياقتالادى دەپ جوسپارلانۋدا.
قاسىم-جومارت توقايەۆ الماتى قالاسىنىڭ حالىقارالىق اۋەجايى قايتا جوندەۋدەن وتكەننەن كەيىن بۇل نىساننىڭ ورتالىق ازيا ايماعىنداعى ءىرى اۆياسيالىق حابقا اينالاتىنىنا سەنىم ءبىلدىردى.
سونىمەن قاتار قازاقستان پرەزيدەنتى بۇقتىرما كوشەسى مەن قۇلجا تراكتىسىنىڭ قيىلىسىندا سالىناتىن ۇزىندىعى 784 مەترلىك كولىك جولايرىعى قۇرىلىسىنىڭ جوباسىمەن تانىستى.
مەملەكەت باسشىسىنىڭ ايتۋىنشا، اتالعان جوبا قالا جولدارىنداعى كەپتەلىستى ازايتۋعا جانە تۇرعىنداردىڭ تىرشىلىگىنە قولايلى جاعداي تۋعىزۋعا مۇمكىندىك بەرەدى.
