قوعام بەلسەندىسى، رەسمي دەرەك بويىنشا تەرگەۋ يزولياتورىندا جۇرەك تالماسىنان قايتىس بولدى دەلىنگەن دۋلات ءاعادىلدىڭ قارىنداسى جانار بەيسەنبايەۆا ادۆوكات ايمان وماروۆاعا ۆيدەوۇندەۋ جولدادى. بىرنەشە كۇن بۇرىن ءاعادىل ءىسى بويىنشا مارقۇم وتباسىنىڭ ادۆوكاتى بولعان وماروۆا ءوزىنىڭ بۇل ىستەن باس تارتاتىنىن مالىمدەگەن. دۋلات ءاعادىلدىڭ قارىنداسى ۆيدەوۇندەۋدە ايمان وماروۆادان كوڭىلى قالعانىن ايتتى. 

"ايمان وماروۆانىڭ مەنىڭ وتباسىما اسىرەسە جەڭگەمە دورەكى سويلەگەنى مەنىڭ جانىما باتتى. ايمان وماروۆا، وسى كەزگە دەيىن ءسىزدىڭ ءبىر ىسىڭىزگە ارالاسىپ، سوزىڭىزگە جاعالاسقانىمىز جوق. ءوزىڭىز ءبىر ەفيرىڭىزدە "ماعان حابارلاسىپ، مازامدى الماڭىزدار" دەپ ايتتىڭىز. سول سەبەپتى ءبىز ۇندەمەدىك. ءسىز تەك اناممەن سويلەسىپ وتىردىڭىز. ءبىراق اناما نە ىستەپ، نە ايتۋ كەرەكتىگىنە دەيىن ايتىپ وتىردىڭىز. مۇنىڭ بارلىعىن بىلەمىز، حاباردارمىز جانە تۇسىنىستىكپەن قارايمىز. دەگەنمەن وتباسىمىزدىڭ اراسىنا ىرىتكى سالۋدىڭ قاجەتى جوق. ءسىز ارانداتتى ەكەن دەپ ءبىز ءوز ارامىزدا ۇرىسىپ قالمايمىز. بۇعان دەيىن ۇرىسىپ، جاعا جىرتىسىپ كورمەدىك، بۇدان كەيىن دە ونداي جاعداي بولمايدى. مەن دۋلاتتىڭ وتباسىن رەنجىتۋگە جول بەرمەيمىن. دۋلاتتىڭ ايەلىنە قالاي قايعىرۋ كەرەكتىگىن ءسىز ۇيرەتپەي-اق قويىڭىز. كۇنى كەشە كۇيەۋىنەن ايىرىلعان ادام ەفيرگە قالاي شىعادى؟ ءوزى ەندى عانا ەسىن جيىپ جاتىر. سىزگە وڭاي كورىنگەن شىعار، ءبىراق جەڭگەمە وڭاي بولمادى. 26 جىل وتاسقان كۇيەۋىنەن ايىرىلۋ وڭاي دەيسىز بە؟ ءبىز سىزدەن ەشتەڭە سۇرامادىق، تالاپ ەتپەدىك. وسىعان دەيىن ۇندەمەدىك. ءبىراق بەلسەندىلەر ارالاسا باستاعاندا ءسىزدىڭ كىم ءۇشىن جۇمىس ىستەيتىنىڭىز بەلگىلى بولدى. الدە ءسىز دۋلاتتىڭ بەلسەندى ەكەنىن بىلمەدىڭىز بە؟ دۋلاتتىڭ بەلسەندى ازامات بولعانى بارلىق قۇجاتتا كورسەتىلگەن. ءتىپتى قۇجاتتاردىڭ بىرىندە "دۋلات ءاعادىل قدت-نىڭ پىكىرىن قولدايدى" دەپ انىق جازىلعان. وسى كەزگە دەيىن ۇندەمەي، ەندى ەفيرگە شىعىپ جاتىر دەمەڭىز. مەنىڭ شىدامىم تاۋسىلدى. سىزدەن كوڭىلىمىز قالدى. اناما حابارلاسىپ، مازاسىن الماڭىز. وسىعان دەيىنگى ەفيرلەرىڭىزدە ناقتى ەشتەڭە ايتىلمادى. ارتىق سۇراق قويعانداردى بۇعاتتاي باستادىڭىز. مەنىڭ  دە سۇراعىمدى جاۋاپسىز قالدىردىڭىز. ءسىز بيلىكتەگىلەردىڭ ەمەس قورعالۋشى ازاماتتىڭ قۇقىعىن قورعاۋىڭىز كەرەك. ارتىق سويلەۋدىڭ كەرەگى جوق. ءومىر الدا، ءالى تالاي كەزدەسەمىز" دەدى جانار بەيسەنبايەۆا. 

بۇعان دەيىن ادۆوكات ايمان وماروۆا بەلسەندى دۋلات ءاعادىلدىڭ ىسىنەن باس تارتۋ سەبەبىن ءاعادىلدىڭ ءولىمىن ساياسي توپتار ءوز مۇددەسىنە پايدالانباق بولعانىمەن تۇسىندىرگەن.