«Nur Otan» پارتياسىنىڭ ماجىلىستەگى فراكسياسى ۇكىمەتتىڭ داعدارىسقا قارسى جوسپارىنا ءبىرقاتار ۇسىنىستار جاسادى. بۇل تۋرالى ءماجىلىس تءوراعاسى، فراكسياسى جەتەكشىسى نۇرلان نىعماتۋلين مالىمدەدى.
وتىرىستا نۇروتاندىق دەپۋتاتتار قازىرگى تاڭدا ۇكىمەت ازىرلەپ جاتقان ەكونوميكالىق ءوسۋدى قالپىنا كەلتىرۋ جونىندەگى كەشەندى جوسپارىنا فراكسيانىڭ ۇسىنىستارىن تالقىلادى.
– مەملەكەت باسشىسى قاسىم-جومارت كەمەل ۇلى توقايەۆتىڭ توتەنشە جاعداي جونىندەگى مەملەكەتتىك كوميسسيانىڭ قورىتىندى وتىرىسىندا سويلەگەن ءسوزى كوپجاقتى دا ماڭىزدى ءىس-قيمىل باعدارلاماسى بولىپ تابىلادى. ەندى بارلىق كۇش-جىگەردى ەڭ الدىمەن داعدارىستىڭ سالدارىن ەڭسەرۋگە، ۇلتتىق ەكونوميكانى قالپىنا كەلتىرۋگە جانە ازاماتتاردىڭ ءال-اۋقاتىن جاقسارتۋعا جۇمىلدىرۋ قاجەت. «Nur Otan» پارتياسىنىڭ ماجىلىستەگى فراكسياسى، ارينە، ەكونوميكالىق ءوسۋ شارالارىن دايىنداۋعا جانە ىسكە اسىرۋعا بەلسەندى قاتىسادى. ءبىزدىڭ باستى مىندەتىمىز – پرەزيدەنتتىڭ باستامالارىن ىسكە اسىرۋدى زاڭنامالىق تۇرعىدان قامتاماسىز ەتۋ، – دەدى نۇرلان نىعماتۋلين.
ول ءۇشىن ءماجىلىس دەپۋتاتتارى، «Nur Otan» پارتياسى فراكسياسىنىڭ مۇشەلەرى «5-10-20» پيلوتتىق جوباسىن زاڭدى تۇردە قامتاماسىز ەتۋدى قاراستىرۋدا.
سونىمەن قاتار فراكسيانىڭ ۇسىنىستارىنىڭ قاتارىندا اۋىلشارۋاشىلىق ونىمدەرىن، ونىڭ ىشىندە كەلىسىم-شارتتىق قارجىلاندىرۋ تەتىگى ارقىلى كەپىلدەندىرىلگەن ساتىپ الۋ تاجىريبەسىنە نەگىزدەلگەن ازىق-تۇلىكپەن قامتاماسىز ەتۋ باعدارلاماسىن قالىپتاستىرۋ دا بار.
دەپۋتاتتار باسىمدى سالالارداعى ستراتەگيالىق ينۆەستورلاردىڭ تۇراقتىلىعىن قامتاماسىز ەتۋ ءۇشىن قولدانىستاعى ينۆەستيسيالىق زاڭناماعا قاجەتتى تۇزەتۋلەر ەنگىزۋدىڭ ماڭىزدىلىعىنا نازار اۋداردى.
«Nur Otan» پارتياسىنىڭ فراكسياسى ازاماتتىق-قۇقىقتىق كەلىسىمشارتتار بويىنشا جەكە زەينەتاقى كىرىستەرىنەن مىندەتتى زەينەتاقى جارنالارى مولشەرىن 10% -دان 5%-عا دەيىن تومەندەتۋدى زاڭنامالىق تۇردە قاراستىرۋدى، سونداي-اق، الەۋمەتتىك ماڭىزى بار تاۋارلارعا باعا بەلگىلەۋ تەتىگى بويىنشا نورماتيۆتىك قۇقىقتىق اكتىلەردىڭ ساقتالۋىن قامتاماسىز ەتۋدى ۇسىنادى.
وسى ۇسىنىستاردىڭ قاتارىندا – زاڭدى تۇلعالارعا جانە جەكە كاسىپكەرلەرگە قاتىستى اعىمداعى جىلدىڭ 1 قازانىنا دەيىن بانكروتتىق تۋرالى ءىس جۇرگىزۋدى توقتاتا تۇرۋ ءۇشىن زاڭنامالىق شارالار قابىلداۋ، زاڭنامالىق دەڭگەيدە بانكتىك ەمەس نەسيەلىك ۇيىمداردىڭ ميكروقارجى قىزمەتىن مىندەتتى ليسەنزيالاۋدى قامتاماسىز ەتۋ بار.
نۇروتاندىق-دەپۋتاتتار تۋريستىك قىزمەتتى زاڭنامالىق تۇرعىدان قامتاماسىز ەتۋگە، جۇمىسپەن قامتۋدىڭ جول كارتاسىندا جاستاردىڭ جۇمىس ورىندارىن قۇرۋدا باسىمدىققا ءمان بەرۋگە، ەپيدەميولوگتاردى، ينفەكسيالىق اۋرۋلار بويىنشا مامانداردى جانە ۆيرۋسولوگتاردى دايارلاۋعا مەملەكەتتىك ءبىلىم بەرۋ تاپسىرىسىن ارتتىرۋعا ەرەكشە نازار اۋداردى.
پىكىر قالدىرۋ