وبلىستاعى 648 مەكتەپ، ونىڭ ىشىندە شالعايداعى ەلدى-مەكەندەردەگى شاعىن جيناقتالعان مەكتەپتەردىڭ بارلىعى قاشىقتىقتان وقىتۋ جۇيەسىنە كوشتى. ناتيجەسى كوڭىل قۋانتارلىق. مەكتەپ وقۋشىلارى دا، ستۋدەنتتەر دە ونلاين رەجيمدە ەشقانداي كەدەرگىسىز، ساپالى ءبىلىم الۋدا.
ۇلان اۋدانىنداعى ب.احمەتوۆ اتىنداعى ورتا مەكتەپتىڭ ورىس ءتىلى جانە ادەبيەتى ءپانىنىڭ ءمۇعالىمى قارلىعاش ادىلحانوۆانىڭ ايتۋىنشا، ءبىرىنشى اپتادا بۇل رەجيمدە ساباق وقۋ بالالار ءۇشىن قيىن بولعان. ال ءقازىر جەڭىل. وسى مەكتەپ ديرەكتورىنىڭ م.ا. ۆەنارا قالييەۆانىڭ ايتۋىنشا، بالالار ينتەرنەتپەن جانە كومپيۋتەرمەن تولىق قامتاماسىز ەتىلگەن.
الەۋمەتتىك جاعىنان از قامتىلعان وتباسىلاردا تاربيەلەنىپ جاتقان بالالارعا وبلىس اكىمى دانيال احمەتوۆتىڭ قولداۋىمەن نوۋتبۋكتەر مەن روۋتەرلەر ۋاقىتشا بەرىلدى.
- بالالارىمنىڭ قاتاردان قالماي، ساپالى ءبىلىم الۋىنا جاعداي جاساپ، قاجەتتى جابدىقتارمەن قامتاماسىز ەتكەنى ءۇشىن ايماق باسشىسى دانيال احمەتوۆ پەن وبلىستىق ءبىلىم باسقارماسىنا العىسىمدى بىلدىرگىم كەلەدى، - دەدى كوپبالالى انا گۇلجانات نۇرعالييەۆا.
وڭىرلەردە وقۋشىلارعا ينتەرنەت جانە تەلەديدار ارقىلى ساباق وتكىزۋدىڭ 2 ءتۇرى ۇيىمداستىرىلدى. ءبىرىنشى باعىت بويىنشا كۇندەلىك.kz، Bilimland.kz جانە Daryn.online.kz ينتەرنەت-پلاتفورمالارى جۇزەگە اسىرىلسا، بۇل اتالعان جۇيەلەر بارلىق مۇعالىمدەر مەن وقۋشىلارعا قول جەتىمدى بولدى. وسى فورماتتا 248 ەلدى مەكەندە 430 مەكتەپتىڭ 172 437 وقۋشىسى (91،5%) وقيدى. كەرى بايلانىس - kundelik.kz ەلەكتروندى جۋرنالدارى مەن WhatsApp مەسسەندجەرى ارقىلى جۇزەگە اسىرىلادى. ەكىنشى باعىتتا تەلەساباقتار ۇيىمداستىرىلادى. ينتەرنەت جىلدامدىعى تومەن 218 ەلدى مەكەندە (218 مەكتەپ) تۇراتىن 15 841 وقۋشى (8،5%) El Arna، Balapan جانە قازاقستان ۇلتتىق تەلەارنالارى ارقىلى ءبىلىم الادى.
- قازىرگى ۋاقىتتا مۇعالىمدەردىڭ دە جۇمىسى كوبەيىپ، اتا-انالاردىڭ ۇستازدىڭ ەڭبەگىنە دەگەن كوزقاراستارى وزگەردى. سوندىقتان وقۋشىلار مەن اتا-انالار دا تۇسىنىستىكپەن قاراپ، ءوز ۇلەستەرىن قوسۋى قاجەت دەپ ويلايمىن. سىن ساعاتتا ۇشتىك وداق بىرلەسكەن جاعدايدا قاشىقتىقتان وقىتۋدى ناتيجەلى، ابىرويمەن جۇزەگە اسىراتىنىمىزعا سەنىمدىمىن، - دەدى ءبىلىم باسقارماسىنىڭ «شىعىس» ادىستەمەلىك ورتالىعىنىڭ ديرەكتورى مۇڭلىق اسانوۆا.
وبلىستىق «شىعىس» وقۋ-ادىستەمەلىك ورتالىعى مۇعالىمدەرگە ادىستەمەلىك قولداۋ كورسەتۋ ماقساتىندا قاشىقتان وقىتۋدا پەداگوگتارعا الەۋمەتتىك جەلىلەر ارقىلى ينتەرنەت پلاتفورمالاردا جۇمىس ىستەۋدىڭ الگوريتمدىك قادامدارىن ۇسىنىپ، «وقۋشىمەن كەرى بايلانىستى قالاي ورناتاسىڭ؟»، «وقۋ ماتەريالدارىن قالاي ازىرلەيسىڭ؟»، «قانداي سيفرلىق پلاتفورمالاردى قولداناسىڭ؟» تاقىرىبىندا وقۋ سەمينارلار ۇيىمداستىردى.
- پەداگوگتارعا قاشىقتىقتان وقىتۋدا پلاتفورمالاردى پايدالانۋدىڭ جولدارىن مەڭگەرتۋ ءۇشىن «ۇستاز» ورتالىعى ۇيىمداستىرعان تەگىن ونلاين مارافونىنىڭ (قاشىقتان ساباق بەرۋ جولدارى) سىلتەمەلەرى بەرىلدى. بۇدان بولەك، وبلىستىڭ ءموبيلدى توبىنداعى پەداگوگتار قاشىقتان وقىتۋ جاعدايىندا وقۋشىلاردان كەرى بايلانىس الۋدىڭ ءتيىمدى جولدارىن ۇسىناتىن بەينەروليكتەر ازىرلەپ، الەۋمەتتىك جەلىلەر ارقىلى مۇعالىمدەرگە قولداۋ كورسەتتى، - دەدى مۇڭلىق اسانوۆا.
قاشىقتان وقىتۋدىڭ ەكىنشى اپتاسىنان باستاپ وبلىسىمىزداعى 2000-عا جۋىق ءمۇعالىمنىڭ ىس-تاجىريبەلەرى زەردەلەنىپ، ءار ءپان بويىنشا 1700 ساباقتىڭ ۇلگى جوسپارى جاسالدى.
ءبىلىم باسقارماسىنىڭ سايتىندا قاشىقتان وقىتۋعا بايلانىستى قوسىمشا بەت اشىلىپ، «قاشىقتان وقىتۋدىڭ ۇزدىك تاجىريبەلەرى» رۋبريكاسى بولىمىنە ۇزدىك ساباقتاردىڭ جوسپارى، ادىستەمەلىك نۇسقاۋلىقتار، ۇسىنىمدار، جادىنامالار ورنالاستىرىلدى.
- پەداگوگتار اسسوسياسياسى ازىرلەگەن 1-11 سىنىپتارعا ارنالعان IV توقسانداعى نەگىزگى پاندەردىڭ ۆيدەو-ساباقتارى YouTube كانالىنا جۇكتەلدى. بۇل ساباقتاردى مۇعالىمدەر مەن وقۋشىلار رەسۋرس رەتىندە پايدالانۋدا. الداعى ۋاقىتتا بەينەساباقتار مەدياتەكاسىن تولىقتىرۋ جۇمىستارى جالعاستىرىلادى، - دەدى مۇڭلىق اسانوۆا.
وبلىستىق «شىعىس» وقۋ-ادىستەمەلىك ورتالىعى «نازاربايەۆ زياتكەرلىك مەكتەپتەرى» دببۇ پەداگوگيكالىق شەبەرلىك ورتالىعىنىڭ وسكەمەن قالاسىنداعى فيليالىمەن بىرلەسىپ، ونلاين تارتىبىندە «قاشىقتان وقىتۋ اياسىندا جالپى ءبىلىم بەرەتىن مەكتەپتەردىڭ 1-10 سىنىپتارىندا بجب جانە تجب ۇيىمداستىرۋ جانە جۇرگىزۋ ەرەكشەلىكتەرى» اتتى «ادىستەمەلىك الاڭ» وتكىزدى.
رەسپۋبليكالىق «ورلەۋ» بىلىكتىلىكتى ارتتىرۋ ۇلتتىق ورتالىعى اق ۇيىمداستىرعان رەسپۋبليكالىق بەينە-ساباقتار كونكۋرسىنا وبلىستان ءىV توقسانعا ارنالعان 12 بەينە-ساباق ىرىكتەلىنىپ جىبەرىلدى.
ينتەرنەت-پلاتفورمالارىمەن جۇمىس ىستەۋ تاجىريبەسى از 400 پەداگوگ ەرىكتى تۇردە ءبىلىم بەرۋ ۇيىمدارىنىڭ رەسپۋبليكالىق قاۋىمداستىعىنىڭ قىسقا مەرزىمدى ۆەبينار كۋرسىنان وتۋدە.
- ۇلى وتان سوعىسى جەڭىسىنىڭ 75 جىلدىعىن مەرەكەلەۋگە جانە وتان قورعاۋشىلار كۇنىنە ارنالعان وبلىستىق ءىس-شارالار جوسپارىن ىسكە اسىرۋ اياسىندا «ەرلىك ساباعى» تاقىرىبىندا قاشىقتىقتان وقىتۋ ساباعىنىڭ ۇزدىك ادىستەمەلىك ازىرلەمەسى وبلىستىق بايقاۋىن وتكىزدى. وعان 96 پەداگوگ قاتىستى. وبلىستىق كەزەڭگە 23 جەڭىمپازدىڭ جۇمىستارى ۇسىنىلدى، - دەدى مۇڭلىق اسانوۆا.
شىعىس قازاقستان وبلىسىندا مەكتەپتەردە ا. قۇنانباي ۇلىنىڭ 175 جىلدىق مەرەيتويىن ۇيىمداستىرۋ جانە مەرەكەلەۋ جونىندەگى وبلىستىق جوسپار نەگىزىندە «ۇزدىك ابايتانۋ كابينەتى» وبلىستىق قاشىقتىقتان بايقاۋى ءوتتى. بايقاۋعا ەرەجەگە سايكەس قالالىق/اۋداندىق كەزەڭدە «ۇزدىك كابينەت» دەپ تانىلعان 27 مەكتەپتىڭ ماتەريالدارى ۇسىنىلدى. بايقاۋدىڭ قورتىندىسى بويىنشا 11 مەكتەپكە جۇلدەلى ورىندار بەرىلدى جانە 16 مەكتەپكە نوميناسيالار تاعايىندالدى.
«قۇرمەت» وردەنىنىڭ، كسرو مەملەكەتتىك سىيلىعىنىڭ لاۋرەاتى، ق ر ەڭبەك سىڭىرگەن ءمۇعالىمى، ۇلاعاتتى ۇستاز قانيپا بىتىبايەۆانىڭ 75 جىل تولۋىنا وراي «ۇستازدارعا ۇستاز بولعان اسىل جان» اتتى اپتالىق قاشىقتىقتان ۇيىمداستىرىلدى.
مامىر ايىنان باستاپ 650 ءپان مۇعالىمدەرى قىسقا مەرزىمدى قاشىقتان بىلىكتىلىكتى ارتىرۋ كۋرسىنان وتۋدە.
قاشىقتان وقىتۋدى ساپالى ۇيىمداستىرۋ ماقساتىندا وبلىستا جوبالىق كەڭسە قۇرىلدى، ول كۇن سايىن قاشىقتان وقىتۋ پروسەسىن ۇيلەستىرەدى جانە ادىستەمەلىك پەن تەحنيكالىق قولداۋدى قامتاماسىز ەتەدى.
ءبىلىم باسقارماسى مەن قالا جانە اۋدانداردىڭ ءبىلىم بولىمدەرىندە جاڭا فورماتتاعى وقۋ پروسەسىندە تۋىندايتىن سۇراقتارعا جاۋاپ بەرەتىن، 20 كولل-ورتالىعى جۇمىس ىستەيدى. اتا-انا، ءمۇعالىم تاراپىنان تۇسكەن سۇراقتارعا ادىستەمەلىك قولداۋ كورسەتۋ ماقساتىندا ادىسكەرلەر تاراپىنان كومەكتەر دە كورسەتىلەدى.
شقو اقپارات ورتالىعى
