بارلىق ستاندارتقا سايكەس كەلەتىن كارديولوگيالىق ورتالىق وبلىستىق كلينيكادان ەش كەم ەمەس. مۇندا اياگوزدىكتەردەن بولەك، ءۇرجار، جارما، تارباعاتاي اۋداندارىنىڭ تۇرعىندارىنا دا مەديسينالىق كومەك كورسەتىلەدى. اتالمىش نىساننىڭ قۇرىلىس جۇمىستارىمەن شقو اكىمى دانيال احمەتوۆ ءىس ساپار بارىسىندا تانىسىپ قايتتى.
كارديولوگيالىق ورتالىق اۋداندىق اۋرۋحانا نەگىزىندە سالىنۋدا. اۋداندىق ورتالىق اۋرۋحانانىڭ باس دارىگەرى شالقار وماروۆتىڭ ايتۋىنشا، بۇل ورتالىقتى سالۋ قاجەتتىلىگى بۇرىن تۋىنداعان. وسىعان دەيىن وتكىر نەمەسە جەدەل كارديولوگيالىق پاتولوگياسى بار ناۋقاستاردىڭ دەنى سەمەي، وسكەمەن، نۇرسۇلتان جانە الماتىداعى كارديولوگيالىق كلينيكالارعا ەم قابىلداۋعا جىبەرىلگەن.
اياگوزدەگى كارديولوگيالىق ورتالىققا جوندەۋ جۇمىستارىن جۇرگىزۋ تۋرالى كەلىسىم اعىمداعى جىلدىڭ 20 اقپانىندا جاسالعان. بۇگىندە مۇنداعى جوندەۋ جۇمىستارىنىڭ 60 پايىزى اتقارىلعان. 1 ماۋسىمعا دەيىن اتالمىش نىسانداعى قۇرىلىس-مونتاجداۋ جۇمىستارى اياقتالادى دەپ كۇتىلەدى.
– بارلىق قاجەتتى قۇرالدار ساتىپ الىندى. 15 مامىرعا دەيىن مەديسينالىق رەنتگەن-انگيوگرافيالىق اپپاراتى ورناتىلادى. مۇندا كومپيۋتەرلىك توموگرافيا بار. ايتا كەتەتىن ءبىر جايت، اۋرۋحانادا وتتەگىمەن قامتاماسىز ەتۋ وڭ جولعا قويىلعان. مۇندا وتكىر نەمەسە جەدەل كارديولوگيالىق پاتولوگياسى بار ناۋقاستار ەمدەلەتىن بولادى. بىزدە ينسۋلتتىق ورتالىق جەمىستى ەڭبەك ەتۋدە. ەكى جىلدىڭ ىشىندە 1870 ادامدى ەمدەپ، 970 ادامدى وڭالتۋدان وتكىزدىك، - دەدى شالقار وماروۆ.
ايماق باسشىسى دانيال احمەتوۆ قۇرىلىس جۇمىستارىنا وڭ باعاسىن بەردى. سونداي-اق ول اۋداندىق ورتالىق اۋرۋحاناداعى وتكەن جىلى مەديسينالىق قىزمەت كورسەتۋ بويىنشا ءىىى دەڭگەيگە وتكەن بوسانۋ بولىمشەسىنە باردى.
– بۇل اۋىلداعى مەديسينانىڭ باسقا دەڭگەيى. جۋىق ارادا مۇندا انيوگراف قويىلادى. سوندا اياگوزدەگى اۋداندىق اۋرۋحانانىڭ قىزمەت كورسەتۋ دەڭگەيى وسكەمەن مەن سەمەيدەن ەش كەم بولمايدى. بۇگىندە وسى اۋرۋحانادا جۇمىس ىستەيتىن 15 دارىگەر ەۋروپاعا بارىپ، بىلىكتىلىكتەرىن شىڭداپ قايتتى. بۇل العا جىلجۋدىڭ ناقتى كورىنىسى، - دەدى دانيال احمەتوۆ.
ءىس ساپار سوڭىندا ايماق باسشىسى بەس قاباتتى تۇرعىن ءۇيدىڭ قۇرىلىس جۇمىستارىمەن تانىستى. اعىمداعى جىلدىڭ 15 ماۋسىمىندا 60 پاتەرلى كوپقاباتتى تۇرعىن ءۇي قولدانىسقا بەرىلەدى.
