الماتى قالاسىنىڭ اكىمى باقىتجان ساعىنتايەۆ جەتىسۋ اۋدانىنداعى جوبالار ۇلگىسىندە «جۇمىسپەن قامتۋدىڭ جول كارتاسى» باعدارلاماسىنىڭ ىسكە اسىرىلۋ بارىسىمەن تانىستى. بۇل تۋرالى ءىnstagram پاراقشاسىندا جاريالادى.
– بۇگىن جۇمىس ساپارى بارىسىندا «ونەركاسىپتىك» جەتىسۋ اۋدانىنىڭ اباتتاندىرۋ جۇمىستارىمەن تانىستىم. 2019 جىلى بۇل اۋداندا 7 سكۆەر مەن ساياباق سالىندى. بيىل 12 گۇلزار اباتتاندىرىلادى. ءبىرقاتار جوبالار، سونىڭ ىشىندە بالاباقشالار، ارىق جەلىلەرى مەن اۋلالاردى جوندەۋ جۇمىستارى «جۇمىسپەن قامتۋدىڭ جول كارتاسى» اياسىندا جۇزەگە اسىرىلۋدا. بۇل شارالار 700-دەن استام ادامدى جۇمىسپەن قامتىماق، – دەدى ب. ساعىنتايەۆ.
سونىمەن قاتار قالا اكىمى رەكرەاسيالىق ايماقتاردى عانا رەتكە كەلتىرىپ قويماي، كەشەندى تۇردە سوعان ىرگەلەس جاتقان اۋماقتاردى دا قالىپقا كەلتىرۋدى تاپسىرعانىن اتاپ ءوتتى.
– بۇل جۇمىستا وتاندىق وندىرىستەگى زاماناۋي ءارى ۇزاق مەرزىمگە جارامدى ماتەريالداردى پايدالانۋ قاجەت. اۋداندا 220 مىڭ اعاش بار بولسا، سونىڭ 5 مىڭى سوڭعى 3 جىلدا وتىرعىزىلىپتى. قالا تۇرعىندارىنىڭ سۇرانىسى بويىنشا ءومىر ءسۇرۋ مەن جۇمىس ىستەۋگە ىڭعايلى، سونداي-اق دەمالىس ۋاقىتىن ءتيىمدى وتكىزۋ ءۇشىن بارلىق جاعداي جاسالىپ، بۇل باعىتتاعى جۇمىستار جالعاسىن تابادى. بۇل – ەرەكشە ميكروكليماتتىڭ ورنىعۋىنا، قالا تۇرعىندارىنىڭ كوڭىل-كۇيىنە وڭ اسەر ەتەتىن بولادى، – دەدى شاھار باسشىسى.
پىكىر قالدىرۋ